Польша орқали Украинадан эвакуация қилинган Ўзбекистон фуқаролари сони 4,3 минг кишидан ошди

6—7 март кунлари Украинадан Польшанинг Катовице аэропорти орқали 674 нафар Ўзбекистон фуқароси, шу жумладан, 109 нафар аёл, 57 нафар вояга етгаман шахс ва 12 нафар чақалоқ олиб келинди. Бу ҳақда Ташқи ишлар вазирлиги расмий вакили хабар қилди.

Маълум қилинишича, 28 февралдан 7 мартга қадар 19 та авиарейс ташкиллаштирилган ҳамда уруш бўлаётган жойлардан 4 359 нафар Ўзбекистон фуқароси ватанига қайтарилган.

Шунингдек, 7 март куни яна битта рейсни амалга ошириш режалаштирилган.

Польша ҳудудида Ўзбекистоннинг 350 дан ортиқ фуқароси қолмоқда. Улардан 80 нафари Польша давлат чегарасидаги тўпланиш нуқтасига, қарийб 270 нафари эса Катовице аэропортига жойлаштирилган.

«Ўзбекистоннинг Украинадаги элчихонаси ватандошлар билан доимий мулоқот олиб бормоқда. Дипломатлар Украинанинг турли нуқталарида, шу жумладан, жанг ҳаракатлари давом этаётган ҳудудларда бўлиб, фуқароларимизни эвакуация қилиш ишларини амалга оширмоқдалар», — дейилади хабарда.

Ўзбекистоннинг Украинадаги элчихонаси фуқароларга Молдовага бориш осонроқ бўлса, ушбу вариантни кўриб чиқишлари лозимлигини билдирганди. Ушбу фуқароларнинг кейинчалик ватанига эвакуация қилинишини ташкил этиш учун элчихона томонидан уларнинг рўйхати ва маълумотлар базаси шакллантирилмоқда.

Украина фуқаролигини олган ёки Ўзбекистонликлар билан оила қурган бошқа давлат фуқаролари ушбу давлатдан пуллик асосда эвакуация қилиниши мумкин.