“Oliy ta’lim sohasidagi xizmatlari uchun” hamda “O‘rta maxsus va professional ta’lim sohasidagi xizmatlari uchun” ko‘krak nishonlarini ta’sis etish bo‘yicha Vazirlar Mahkamasi qarori jamoatchilik muhokamasiga qo‘yildi.
Qayd etilishicha, ko‘krak nishoni bilan oliy ta’lim sohasida yoshlarni voyaga yetkazishda fidokorona mehnat qilayotgan, yorqin iste’dodi va ijodi, vatanparvarlik fazilatlari bilan el-yurt o‘rtasida hurmat qozongan faol, tashabbuskor, sog‘lom va barkamol avlodni voyaga yetkazish, yosh avlodni vatanparvarlik g‘oyalariga sadoqat ruhida tarbiyalash borasida soha rivojiga munosib hissa qo‘shgan fuqarolar taqdirlanadi.
Buning uchun ta’lim muassasalari nomzodlarni ko‘krak nishoni bilan taqdirlash bo‘yicha har yili 20-iyulga qadar Oliy va o‘rta maxsus ta’lim vazirligiga taklif kiritadi. Taklifda nomzod haqida ma’lumotnoma, so‘nggi 3 yil davomida samarali faoliyati aks ettirilgan tavsifnoma bo‘lishi kerak.
Ko‘krak nishonlari 1-oktabr — O‘qituvchi va murabbiylar kuni bayrami arafasida topshiriladi. Mukofotlash oliy va o‘rta maxsus ta’lim vaziri buyrug‘i asosida amalga oshiriladi. Vazir tomonidan har yili 1-avgustga qadar ko‘krak nishoni bilan taqdirlashga oid takliflarni ko‘rib chiqish bo‘yicha komissiya tashkil etiladi.
Ko‘krak nishoni bilan chet el fuqarolari va fuqaroligi bo‘lmagan shaxslar ham nizom talablari asosida taqdirlanishi mumkin. Chet el fuqarolarini taqdirlashga doir taqdimnoma komissiyaga kiritiladi.
Komissiya tomonidan nomzodlarni ko‘krak nishoni bilan taqdirlashda quyidagilar inobatga olinadi:
- oliy ta’lim muassasalarining pedagog xodimlari faoliyatini o‘rganish mezonlarida qayd etilgan ko‘rsatkichlar bo‘yicha olingan yuqori baholar;
- talabalar orasida ilm-fanga bo‘lgan qiziqishni oshirish, ustoz-shogird an’analarini targ‘ib qilishdagi faol ishtiroki;
- olib borayotgan ilmiy tadqiqotlari, ijodiy faoliyatlari va yaratayotgan o‘quv-uslubiy qo‘llanmalarida yangiliklarning ko‘pligi tan olinganligi;
- o‘z pedagogik faoliyatida turli innovatsion samarali usullarni ishlab chiqqanligi.
- o‘zi faoliyat olib borayotgan oliy ta’lim muassasasida amalga oshirgan ishlari tufayli hamkasblari tomonidan chuqur hurmatga sazovorligi.
“O‘rta maxsus va professional ta’lim sohasidagi xizmatlari uchun” hamda “Oliy ta’lim sohasidagi xizmatlari uchun” ko‘krak nishonining diametri 34 millimetrli doira shaklida bo‘lib, mis qotishmasidan tayyorlanadi.
Avvalroq O‘zbekistonda xalq ta’limi tizimini isloh qilish bo‘yicha milliy kengash tashkil etilishi xabar qilingandi. Kengash o‘qituvchi kasbining maqomi va obro‘sini ko‘tarish, ularning moddiy va ijtimoiy qo‘llab-quvvatlanishini ta’minlash, samarali mehnat faoliyati uchun munosib sharoitlar yaratishga ko‘maklashadi.
Izoh (0)