6-mart kuni Rossiyaning “TASS”, “Interfaks” va “RIA Novosti” axborot agentliklari bir vaqtda Ukrainada yadro qurolini yaratish bo‘yicha ishlar olib borilayotgani haqida xabar tarqatdi. Agentliklar o‘z xabarida “vakolatli idoralardan biridagi” manbaga tayanganini yozgan va bir xil iqtibos keltirgan.
Xabarlarda aytilishicha, Ukraina 1994-yilda Yadro qurolini tarqatmaslik to‘g‘risidagi shartnomaga qo‘shilganidan so‘ng darhol “o‘z yadro qurolini yaratish uchun texnologik asos ishlab chiqish maqsadida” tadqiqot ishlarini boshlagan va 2014-yilda bu ishni kuchaytirgan.
Yadro kallaklarini loyihalashda qo‘llanishi mumkin bo‘lgan yadroviy portlovchi qurilmani yaratish bo‘yicha ilmiy-tadqiqot ishlari (“NIOKR”) keyinchalik uran va plutoniy zonalarida amalga oshirildi. Ukraina ilmiy hamjamiyati ham “portlovchi”, ham “o‘t ochuvchi” turdagi qurilmani yaratish uchun yetarli vakolatlarga ega, — deydi “vakolatli manba”.Har uchala agentlik xabarida aytilishicha, Ukraina bir necha oy ichida yadro qurolini yaratishi mumkin.
SSSR parchalanganidan keyin Ukraina tasarrufidagi yadro qurollari olib qo‘yilgandi. Mamlakat Ukraina xavfsizligini kafolatlagan Budapesht memorandumi doirasida yadroviy maqomdan voz kechgan. Memorandum Ukraina, Rossiya, AQSh va Buyuk Britaniya tomonidan imzolangan.
18-fevral kuni Ukraina prezidenti Vladimir Zelenskiy o‘sha memorandum doirasida muzokaralar o‘tkazishga chaqirdi. “Agar muzokaralar o‘tkazilmasa yoki ularning natijalariga ko‘ra davlatimiz xavfsizligini ta’minlash bo‘yicha aniq qarorlar qabul qilinmasa, Ukraina Budapesht memorandumi ishlamayapti, deb hisoblashga va 1994-yildagi barcha qarorlar paketini shubha ostiga olishga to‘liq haqli”, — dedi Zelenskiy.
Mavzuga doir:
- Tamaddun intihosi: yadro urushi xavfi haqiqatga qanchalik yaqin va uning oqibatlari qanday bo‘ladi?
- “Yadroviy urush boshlansa, unda g‘oliblar bo‘lmaydi”. Putin va Makron Moskvada 5 soatlik muzokara o‘tkazdi. Asosiy ma’lumotlar
- Zelenskiy Minsk va Moskvani yadroviy qurollarga oid tahdidlar bilan “o‘ynamaslikka” chaqirdi
Izoh (0)