НАТО Украинадаги ҳаво йўлини ёпмайди. Мамлакатда парвозсиз ҳудуд ҳақидаги петицияни бир миллион фойдаланувчи имзолаган

НАТО Украина осмонидаги ҳаво йўлини ёпмайди. Бу ҳақда альянс бош котиби Йенс Столтенберг маълум қилди, дея хабар берган Reuters.

Унинг сўзларига кўра, Украина осмонида парвозсиз ҳудуд тартибини белгилаш НАТО кучлари томонидан Россия самолётларининг уриб туширилишини англатган ва ҳарбий низо янада мураккаблашган бўларди.

«Иттифоқчилар НАТО учоқларининг Украина ҳаво йўлида учмаслигини таъминлаш тарафдори, улар альянс қўшинларининг Украина ҳудудига киришига ҳам қарши», — дея қайд этган Столтенберг.

«Украинанинг аламзада эканлигини тушунамиз, лекин мамлакат осмонида парвозсиз ҳудуд ташкил қилиниши Европада кенг миқёсли катта уруш бошланишига олиб келиши мумкин. Унда кўплаб мамлакатлар иштирок этади ва ушбу урушнинг оқибати, зиёни ҳам жуда катта бўларди», — дея қўшимча қилган НАТО бош котиби.

24 февралда Россия қўшинлари Украинада махсус ҳарбий операцияларни бошлади, Украина шу куннинг ўзида фуқаролик авиацияси самолётлари учун ҳаво йўллари ёпилганини эълон қилди.

НАТО кучлари томонидан Украина ҳаво йўлларида парвозсиз ҳудуднинг ташкил қилиниши альянснинг ҳаводан зарбага қарши курашиш қуролларини Россиянинг ҳаводан ҳужумларига қарши ишлатилишини англатади. Маълумотларга кўра, Украинага бўлаётган ҳужумларнинг асосий қисми масофадан туриб йўлланмоқда яъни ҳаво ҳужумларидан иборат.

Украина ҳукумати НАТЎдан бир неча марта парвозсиз ҳудудни ташкил қилишда ёрдам сўраган.

«Гапларим сизга етиб бориши учун яна қанча одам портлаб кетиши, қўллар, оёқлар, каллалар ҳар ёққа учиши керак? Айтинг, яна қанча қурбон керак? Мен бориб санаб чиқаман ва сиз айтган рақам пайдо бўлишини кутамиз», — деган Украина президенти Владимир Зеленский альянс вакилларига қилган мурожаатида.

Европанинг Open Petition сайтига 26 февралда Украина халқининг НАТОга аъзо давлатлардан мамлакатнинг ҳаво йўлларини тўлиқ ёпишни ва Украинага тинчликпарвар қўшинларни киритишни сўраб петиция жойлаштирилган. Ушбу петицияни миллиондан зиёд фойдаланувчи маъқуллаган.

Бир неча кун аввал Оқ уй Украинада парвозсиз ҳудуд ташкил қилиш унчалик яхши ғоя эмаслигини билдирган ва бунда АҚШ Россия билан тўғридан-тўғри низога бориб қолиши мумкинлигини қайд этганди.