Rossiyada Deutsche Welle, BBC, “Amerika ovozi” va Meduza nashrlarining veb-saytlari, shuningdek, Facebook va Twitter ijtimoiy tarmoqlari ayrim foydalanuvchilar uchun ochilmay qoldi. Buni GlobalCheck ma’lumotlari tasdiqlaydi.
Shuningdek, mamlakatda App Store va Google Play dasturlari bloklangani haqida ham xabar berilgan.
Bundan tashqari, Rossiyaning bir qator hududlarida o‘quvchilar “Ozodlik” radiosi veb-saytiga kirishda muammolar kuzatilayotganidan shikoyat qilgan. Meduza’ning ayrim o‘quvchilari ham nashr sayti ochilmayotganini aytgan.
Keyinroq “Roskomnadzor” yuqoridagi nashr va ijtimoiy tarmoqlarning faoliyatiga cheklovlar qo‘yilganini tasdiqladi. Muassasa buni “Ukraina hududidagi maxsus harbiy operatsiya mohiyati haqida yolg‘on ma’lumotlar tarqalayotgani” bilan izohladi.
Xususan, Rossiya rasmiylari nuqtayi nazariga ko‘ra, ushbu ommaviy axborot vositalarida “jangovar operatsiyalarni o‘tkazish usullari (tinch aholiga hujumlar, fuqarolik infratuzilmasiga zarbalar), Rossiya qurolli kuchlarining yo‘qotishlari miqdori va tinch aholi orasidagi qurbonlar haqida noto‘g‘ri ma’lumotlar” nashr etilmoqda.
Avvalroq Rossiyadagi “Exo Moskvi” radiostansiyasi butunlay, “Dojd” telekanali vaqtincha tugatilgandi. “Exo Moskvi” jamoasi faqat YouTube’da ishlashni davom ettirmoqda.
Rossiya rasmiylari faqat Ukrainaning harbiy infratuzilmasiga va faqat yuqori aniqlikdagi qurollar bilan zarba berilayotganini ta’kidlamoqda. Shunga qaramay, ijtimoiy tarmoqlarda Ukraina shaharlarining turar-joylari o‘qqa tutilgani haqida ko‘plab dalillar mavjud. Ukraina viloyatlari rasmiylari va qutqaruvchilar ushbu otishmalar natijasida o‘nlab qurbonlar haqida xabar bermoqda.
Mavzuga doir:
- AQSh senatori Ukrainadagi urushni to‘xtatish uchun Putinni gumdon qilish kerakligini aytdi. Rossiya elchisi buni terrorizmga da’vat deb atadi
- Rossiyada urushga qarshi namoyishlar taqiqlangan. Ammo odamlar Putinning qaroriga norozilik bildirish yo‘lini topdi — mamlakat ko‘chalarida urushni qoralovchi graffiti, varaqa va stikerlar paydo bo‘lmoqda (foto)
Izoh (0)