Chiroqchi tuman YHXB boshlig‘i 130 ming so‘m pora bilan qo‘lga olindi

Qashqadaryo viloyati Chiroqchi tumani yo‘l harakati xavfsizligi boshqarmasi boshlig‘i pora bilan ushlandi, deb xabar bermoqda viloyat prokuraturasi.

Qayd etilishicha, tuman YHXB boshlig‘i S.Umarov va uning jinoiy sherigi pora olish jarayonida qo‘lga tushgan. Holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilgan. Gumonlanuvchilar protsessual tartibda ushlangan.

“Daryo” manbasining qo‘shimcha qilishicha, tuman YHXB boshlig‘i va uning sherigi 130 ming so‘m pora bilan ushlangan.

Avvalroq Chiroqchi tumani hokimi Xurram Jo‘rayev tumanda YTHlar soni ortgani va buning ortidan o‘lim ko‘rsatkichi ko‘paygani bois prezident tanqidiga uchrab, hokim vazifasidan olinib, hokim vazifasini bajaruvchi sifatida tayinlangandi.

Prezident Shavkat Mirziyoyev raisligida 11-fevralda bo‘lib o‘tgan videoselektor yig‘ilishida Chiroqchida 43 ta, Namangan shahrida 42 ta, Yangiyo‘l tumanida 34 ta, Urgutda 28 ta, Andijon tumanida 20 ta avariyada odamlar hayotdan bevaqt ko‘z yumganini gapirib, ushbu tuman va shahar hokimlari, ichki ishlar boshliqlari va prokurorlari ishdan olinib, uch oy sinov muddati berilganini ta’kidlagandi. Tanqiddan so‘ng “Daryo” muxbiri Chiroqchi tumani hokimi Xurram Jo‘rayev bilan suhbatlashgandi.

Unda hokim prezident tanqididan so‘ng tumandagi YPX xodimlari faoliyatini ham tahlil qilganini aytgandi.

“Tumanimiz katta bo‘lishiga qaramasdan, YPX bo‘limi boshlig‘i, o‘rinbosari va xodimlari bilan birgalikda atigi 13 nafar xodim ishlaydi. Shu ishchilarning 10 nafari aynan Chiroqchi tumanidan. Shu sabab viloyat hokimiga taklif kiritib, Chiroqchida ishlashi ko‘zda tutilgan 13 nafar YPX xodimining barchasini boshqa tumanlardan olib kelishni taklif qildim. Aslida chiroqchilik bo‘lgan xodim eng zarur paytda uyiga ketib qolishi mumkin. Biz buni bilmaymiz ham. Shuning uchun boshqa tumanlardan kelib ishlasa, aynan shu yerlik xodimga nisbatan ko‘proq va yaxshiroq ishlagan bo‘lardi, dedim. Taklifim viloyat hokimiga ma’qul keldi. Endi shu usulni ham qo‘llab ko‘rmoqchimiz”, — degandi Xurram Jo‘rayev.