Қашқадарё вилояти Чироқчи тумани йўл ҳаракати хавфсизлиги бошқармаси бошлиғи пора билан ушланди, деб хабар бермоқда вилоят прокуратураси.
Қайд этилишича, туман ЙҲХБ бошлиғи С.Умаров ва унинг жиноий шериги пора олиш жараёнида қўлга тушган. Ҳолат юзасидан Жиноят кодексининг 210-моддаси (пора олиш) билан жиноят иши қўзғатилган. Гумонланувчилар процессуал тартибда ушланган.
«Дарё» манбасининг қўшимча қилишича, туман ЙҲХБ бошлиғи ва унинг шериги 130 минг сўм пора билан ушланган.
Аввалроқ Чироқчи тумани ҳокими Хуррам Жўраев туманда ЙТҲлар сони ортгани ва бунинг ортидан ўлим кўрсаткичи кўпайгани боис президент танқидига учраб, ҳоким вазифасидан олиниб, ҳоким вазифасини бажарувчи сифатида тайинланганди.
Президент Шавкат Мирзиёев раислигида 11 февралда бўлиб ўтган видеоселектор йиғилишида Чироқчида 43 та, Наманган шаҳрида 42 та, Янгийўл туманида 34 та, Ургутда 28 та, Андижон туманида 20 та аварияда одамлар ҳаётдан бевақт кўз юмганини гапириб, ушбу туман ва шаҳар ҳокимлари, ички ишлар бошлиқлари ва прокурорлари ишдан олиниб, уч ой синов муддати берилганини таъкидлаганди. Танқиддан сўнг «Дарё» мухбири Чироқчи тумани ҳокими Хуррам Жўраев билан суҳбатлашганди.
Унда ҳоким президент танқидидан сўнг тумандаги ЙПХ ходимлари фаолиятини ҳам таҳлил қилганини айтганди.
«Туманимиз катта бўлишига қарамасдан, ЙПХ бўлими бошлиғи, ўринбосари ва ходимлари билан биргаликда атиги 13 нафар ходим ишлайди. Шу ишчиларнинг 10 нафари айнан Чироқчи туманидан. Шу сабаб вилоят ҳокимига таклиф киритиб, Чироқчида ишлаши кўзда тутилган 13 нафар ЙПХ ходимининг барчасини бошқа туманлардан олиб келишни таклиф қилдим. Аслида чироқчилик бўлган ходим энг зарур пайтда уйига кетиб қолиши мумкин. Биз буни билмаймиз ҳам. Шунинг учун бошқа туманлардан келиб ишласа, айнан шу ерлик ходимга нисбатан кўпроқ ва яхшироқ ишлаган бўларди, дедим. Таклифим вилоят ҳокимига маъқул келди. Энди шу усулни ҳам қўллаб кўрмоқчимиз», — деганди Хуррам Жўраев.
Изоҳ (0)