Ҳусниддин Ғофуров номи билан маълум бўлган ўзбекистонлик футболчининг асл исми Анваржон экани ва унинг ёши асидан икки ёшга камайтирилгани маълум бўлди. Бу ҳақда ЎФА матбуот хизмати маълум қилди.
Қайд этилишича, асли 1995 йилда туғилган Анваржон Ғофуров Ҳусанбой ўғлининг ҳужжатлари 1997 йилда туғилган укаси Ҳусниддин Ғофуров Ҳусанбой ўғлиники билан алмаштириб қўйилган. Бу ҳақида Ўзбекистон футболчилари уюшмаси ЎФАнинг Футболчиларнинг мақоми ва ўтиши бўйича қўмитасига маълум қилган.
«Йиғилишда 1995 йилда туғилган Ғофуров Анваржон Ҳусанбой ўғлининг вакили сифатида Ўзбекистон футболчилари уюшмаси раиси Камолиддин Мурзоев футболчи ҳақиқатда ҳам бундан бир неча йил аввал, айрим ўзига боғлиқ бўлмаган сабаблар туфайли ўзининг маълумотларини, аниқроғи паспортдаги исми ва фамилиясини укаси – 1997 йилда туғилган Ғофуров Ҳусниддин Ҳусанбой ўғли номига расмийлаштиргани ва айнан ушбу исм ва фамилия остида фаолиятини давом эттирганини таъкидлаб ўтган.
Жиноят ишлари бўйича Фарғона вилоят Бувайда туман судининг 2020 йил 3 март кунидаги ҳукмига кўра Ғофуров Анваржон Ҳусанбой ўғлини укаси Ғофуров Ҳусниддин Ҳусанбой ўғли билан бир-бирларининг шахсий маълумотлари ва исм-фамилияларини алмаштирган ҳолда расмийлаштирилган фуқаролик паспортлари белгиланган тартибда йўқ қилиниб, уларнинг ҳақиқий шахсий маълумотлари ва исм-фамилиялари бўйича фуқаролик паспортлари расмийлаштирилиши таъминланган», — дейилади ЎФА баёнотида.
«Қўмита ушбу вазиятни ўрганиш давомида, футболчи ҳақиқатда ҳам бунга ўзи истамаган ҳолда ўша вақт фаолиятини бошлаган мураббийлари ва ота-онаси қистови билан розилик берган деган хулосага келган.
Футболчиларнинг мақоми ва ўтиши бўйича қўмитаси томонидан Ғофуров Анваржон Ҳусанбой ўғлига унинг ҳақиқий шахсий маълумотлари ва исм-фамилияси асосида расмийлаштирилган фуқаролик паспорти бўйича имзоланган меҳнат шартномаси ва бошқа ҳужжатларини ПФЛдан рўйхатдан ўтказилишига рухсат бериш тўғрисида қарор қабул қилинган. Шунингдек, мазкур қарор нусхаси Ғофуров Анваржон Ҳусанбой ўғлига нисбатан жарима интизомий жазо чорасини қўллаш масаласини кўриб чиқиш учун ЎФА Тартиб-интизом қўмитасига тақдим этилиши белгиланди», — дея қўшимча қилинади.
Изоҳ (0)