Rossiya bilan muzokaralar davomida Ukraina xohlagan natijaga erishish imkoni bo‘lmadi. Bu haqda Ukraina prezidenti Vladimir Zelenskiy Telegram-kanali orqali yo‘llagan murojaatida ma’lum qildi.
“Hozircha biz erishmoqchi bo‘lgan natijamizni olganimiz yo‘q”, — deydi u.
Shu bilan birga, uning ta’kidlashicha, muzokaralarda Rossiya tomoni o‘z pozitsiyasini e’lon qilgan, Ukraina esa “urushni yakunlash bo‘yicha” talablarini ilgari surgan. “Rossiya tomonining ayrim signallarini biz oldik”, — deya qo‘shimcha qiladi Zelenskiy.
Ukraina va Rossiya delegatsiyasining maxsus operatsiyalar boshlanganidan keyingi birinchi uchrashuvi 28-fevral kuni Belarusning Gomel viloyatida bo‘lib o‘tdi. Xavfsizlik nuqtayi nazaridan uchrashuvning aniq joyi oshkor etilmadi.
Muzokaralarda Rossiya tomonidan sobiq madaniyat vaziri Vladimir Medinskiy, mudofaa vaziri o‘rinbosari Aleksandr Fomin, Rossiya Davlat dumasining xalqaro ishlar bo‘yicha qo‘mitasi rahbari Leonid Sluskiy va Rossiyaning Belarusdagi elchisi Boris Grizlov ishtirok etdi.
Ukraina tomonidan esa muzokaralarda mudofaa vaziri Aleksey Reznikov, “Xalq noibi” partiyasi vakili David Araxamiya, prezident ofisi rahbarining maslahatchisi Mixail Podolyak, TIV rahbari o‘rinbosari Nikolay Tochiskiy, Kiyev delegatsiyasi rahbarining uch tomonlama aloqa guruhidagi birinchi o‘rinbosari Andrey Kostin va xalq deputati Rustem Umerov qatnashdi.
Muzokaralar, taxminan, besh soat davom etdi. Podolyakning so‘zlariga ko‘ra, muhokamalarning asosiy mavzusi o‘t ochishni va Ukrainadagi harbiy harakatlarni to‘xtatishga qaratilgan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)