Janubiy Koreya va Singapur Rossiyaga nisbatan eksport nazoratini kuchaytirib, Moskvaga qarshi xalqaro sanksiyalarga qo‘shildi, deb xabar beradi Reuters.
Janubiy Koreya hukumati Rossiyaga eksport qilinadigan strategik materiallarga taqiq joriy etadi. Mamlakat, shuningdek, xalqaro energetika bozorini barqarorlashtirish uchun strategik neft zaxiralarini qo‘shimcha ravishda bo‘shatishga ko‘maklashish va suyultirilgan gazni Yevropaga qayta sotish kabi boshqa choralarni ko‘rib chiqishga qaror qilgan.
“Janubiy Koreya Ukraina atrofidagi vaziyat tufayli Rossiyani SWIFT to‘lov tizimidan uzib qo‘yish borasidagi xalqaro qarorga qo‘shilishga tayyor. Bundan tashqari, mamlakat Rossiyaga strategik materiallarni eksport qilishni taqiqlashga qaror qildi”, — deyiladi Janubiy Koreya TIV bayonotida.
Vazirlikning ta’kidlashicha, Seul Rossiyani SWIFT to‘lov tizimidan uzish to‘g‘risidagi qarori haqida AQShni ogohlantirib, Janubiy Koreya Ukrainaga gumanitar yordamni kuchaytirishini qo‘shimcha qilgan.
Singapur esa o‘z navbatida ayrim Rossiya banklarini va Rossiya bilan bog‘liq moliyaviy operatsiyalarni bloklashni, eksport ustidan nazoratni kuchaytirishga qaror qilgan.
Singapur tashqi ishlar vaziri Vivian Balakrishnan mamlakat Ukrainada fuqarolarga qarshi qurol sifatida foydalanilishi mumkin bo‘lgan buyumlarga eksport nazorati o‘rnatishini ma’lum qilgan. Hozirda aniq choralar ishlab chiqilmoqda va yaqin vaqtlar ichida e’lon qilinadi.
“Rossiya bilan yaxshi munosabatlarimizni qadrlashni davom etamiz. Biroq biz boshqa bir davlatning suvereniteti va hududiy yaxlitligining buzilishiga toqat qila olmaymiz”, — deydi vazir.
Eslatib o‘tamiz, Ukrainaga hujum sabab Osiyoda birinchi bo‘lib Yaponiya Rossiyaga qarshi sanksiyalarni kiritdi. Yaponiya sanksiyalariga ko‘ra, Donbass respublikalari vakillariga viza berish to‘xtatiladi va ularning kapitallari muzlatiladi, mazkur respublikalar bilan eksport-import munosabatlari, shuningdek, Rossiya hukumatining yangi suveren qarzi bo‘yicha operatsiyalar taqiqlanadi.
Izoh (0)