Moskva va Kiyev delegatsiyalari Belarusda o‘tgan muzokaralarning birinchi raundini yakunladi. Ikkinchi raund yaqin kunlar ichida o‘tkaziladi

Moskva hamda Kiyev delegatsiyalari Belarusda bo‘lib o‘tgan muzokaralarning birinchi raundini yakunladi. Bu haqda Ukraina prezidenti ofisi rahbarining maslahatchisi Mixail Podolyak ma’lum qildi. Uning bayonoti “BelTA” axborot agentligi tomonidan to‘g‘ridan to‘g‘ri efirda namoyish etilgan.

Muzokaralar, taxminan, besh soat davom etdi. Podolyakning so‘zlariga ko‘ra, muhokamalarning asosiy mavzusi o‘t ochishni va Ukrainadagi harbiy harakatlarni to‘xtatishga qaratilgan.

“Tomonlar muzokaralarning asosiy maqsadlarini belgilab oldi, masalalarning yechimlari bo‘yicha takliflar oydinlashdi. Ularni amalga oshirish maqsadida tomonlar o‘z poytaxtlariga maslahatlashuvlar uchun qaytib ketdi”, — degan Podolyak.

Uning qo‘shimcha qilishicha, delegatsiyalar yaqin kunlarda muzokaralarning ikkinchi raundini o‘tkazish masalasini ham muhokama qilgan.

Rossiya delegatsiyasi rahbari prezidenti maslahatchisi Vladimir Medinskiy tomonlarning umumiy pozitsiyalar prognoz qilinadigan ayrim nuqtayi nazarlarni belgilab olgan.

“Muzokaralarning asosiy natijasi shuki, bu muzokaralar bo‘lib o‘tdi va tomonlar bir-birini eshitdi. Yaqin kunlarda biroz oldinga siljish bo‘lishi mumkin. Ukrain delegatsiyasi masalaning eng muhim qismlarini eshitish va hal qilishga tayyor edi. Bu esa juda va juda muhim. Keyingi voqealar qanday bo‘lishini yaqin kunlar ko‘rsatadi”, — degan Rossiya delegatsiyasi a’zosi Slutskiy.

O‘z mamlakatlarida rahbariyat bilan maslahatlashuvlardan keyin delegatsiyalar yaqin kunlar ichida yana muzokaralar stoliga o‘tiradi. Keyingi uchrashuv Polsha—Belarus chegarasida bo‘lib o‘tishi kutilmoqda.

Rossiya 24-fevralda Ukrainada maxsus harbiy operatsiyalarni boshlaganini e’lon qilgan. Tomonlar 27-fevralda muzokaralar o‘tkazish haqida kelishib oldi. Rossiya muzokaralarni Gomel shahrida o‘tkazishni reja qilgan va ushbu shaharni Ukraina taklif etganini bildirgan.

Ukraina prezidenti Vladimir Zelenskiy Kiyevning muzokaralarni Rossiya o‘z raketalarini Ukrainaga yo‘naltirgan Belarusda o‘tkazmoqchi emasligini qayd etgan. U har qanday betaraf mamlakat hududida muzokara olib borishga tayyorligini ta’kidlagan.

Yakunda tomonlar Ukraina – Belarus chegarasidagi Gomel viloyatida Pripyat daryosi qirg‘og‘i yaqinidagi rezidensiyada uchrashuv o‘tkazishni kelishib oldi.

Ukraina delegatsiyasi tarkibiga Mixail Podolyak, shuningdek Oliy Radadagi “Xalq xizmatchisi” hukmron partiyasi fraksiyasi rahbari David Araxamiya, Ukraina mudofaa vaziri Aleksey Reznikov kiritilgan. Rossiya delegatsiyasida esa Vladimir Medinskiy, Rossiya TIV vakillari, Mudofaa vazirligi hamda prezident administratsiyasi mas’ullari 1-raundda  eishtirok etgan.