Buxoro viloyati Shofirkon tumanida o‘g‘lining nomidagi fermer xo‘jaligiga tegishli yerni noqonuniy ravishda sotishga uringan ota qo‘lga olindi, deb xabar beradi O‘zA.
Ma’lum qilinishicha, yakka tartibdagi tadbirkor o‘zining o‘g‘li nomida bo‘lgan fermer xo‘jalikning 7,4 gektar yer maydonini hokimiyat idoralaridagi mansabdor tanishlari orqali xaridor nomiga rasmiylashtirib berishni va’da qilgan. Buning evaziga u 84 ming dollarni olgan vaqtida Davlat xavfsizlik xizmati va Bosh prokuratura huzuridagi departamentning hududiy boshqarmalari xodimlari tomonidan ushlangan.
Shuningdek, Samarqand viloyati Oqdaryo tumanidagi fermer xo‘jalik rahbari mazkur xo‘jalik balansidagi 4,8 gektar yer maydonini 45 ming dollarga sotishga kelishib, oldindan 25 ming dollar olgan vaqtida, Urgut tumanidagi fermer xo‘jalik boshqaruvchisi esa 1 gektar yerni xaridor nomiga rasmiylashtirib berish evaziga 20 ming dollar olgan vaqtida qo‘lga olingan.
Toshkent shahrida kuzatilgan holatda Bektemir tumanidagi bog‘dorchilik-uzumchilik shirkati a’zosi bo‘lgan fuqaro ushbu shirkat hududidagi 4 sotix yer maydonini yuqori lavozimda ishlovchi tanishlari orqali xaridor nomiga rasmiylashtirib berish evaziga 17,6 ming dollar olgan vaqtida ushlangan.
Toshkent viloyatining Oqqo‘rg‘on tumanidagi dehqon xo‘jaligi rahbari mazkur xo‘jalik balansida bo‘lgan 40 sotix sug‘oriladigan yer maydonini kadastr tizimidagi tanishlari orqali xaridor nomiga rasmiylashtirib berish evaziga 30 ming dollar talab qilgani aniqlangan. U oldindan 10 ming dollar olgan vaqtida DXX va IJQK departamentining viloyat boshqarmalari xodimlari tomonidan qo‘lga olingan.
Hozirda mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq DXX Namanganda 200 ming dollar pora olayotgan davlat xizmatchisini qo‘lga olgani, Surxondaryoda otasiga tegishli yerni 32,5 million so‘mga sotib yuborishga uringan bojxona inspektori ushlangani to‘g‘risida xabar berilgandi.
Izoh (0)