Бухоро вилояти Шофиркон туманида ўғлининг номидаги фермер хўжалигига тегишли ерни ноқонуний равишда сотишга уринган ота қўлга олинди, деб хабар беради ЎзА.
Маълум қилинишича, якка тартибдаги тадбиркор ўзининг ўғли номида бўлган фермер хўжаликнинг 7,4 гектар ер майдонини ҳокимият идораларидаги мансабдор танишлари орқали харидор номига расмийлаштириб беришни ваъда қилган. Бунинг эвазига у 84 минг долларни олган вақтида Давлат хавфсизлик хизмати ва Бош прокуратура ҳузуридаги департаментнинг ҳудудий бошқармалари ходимлари томонидан ушланган.
Шунингдек, Самарқанд вилояти Оқдарё туманидаги фермер хўжалик раҳбари мазкур хўжалик балансидаги 4,8 гектар ер майдонини 45 минг долларга сотишга келишиб, олдиндан 25 минг доллар олган вақтида, Ургут туманидаги фермер хўжалик бошқарувчиси эса 1 гектар ерни харидор номига расмийлаштириб бериш эвазига 20 минг доллар олган вақтида қўлга олинган.
Тошкент шаҳрида кузатилган ҳолатда Бектемир туманидаги боғдорчилик-узумчилик ширкати аъзоси бўлган фуқаро ушбу ширкат ҳудудидаги 4 сотих ер майдонини юқори лавозимда ишловчи танишлари орқали харидор номига расмийлаштириб бериш эвазига 17,6 минг доллар олган вақтида ушланган.
Тошкент вилоятининг Оққўрғон туманидаги деҳқон хўжалиги раҳбари мазкур хўжалик балансида бўлган 40 сотих суғориладиган ер майдонини кадастр тизимидаги танишлари орқали харидор номига расмийлаштириб бериш эвазига 30 минг доллар талаб қилгани аниқланган. У олдиндан 10 минг доллар олган вақтида ДХХ ва ИЖҚК департаментининг вилоят бошқармалари ходимлари томонидан қўлга олинган.
Ҳозирда мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Аввалроқ ДХХ Наманганда 200 минг доллар пора олаётган давлат хизматчисини қўлга олгани, Сурхондарёда отасига тегишли ерни 32,5 миллион сўмга сотиб юборишга уринган божхона инспектори ушлангани тўғрисида хабар берилганди.
Изоҳ (0)