O‘zbekiston tashqi ishlar vaziri Abdulaziz Komilov 28-fevral kuni bo‘lib o‘tgan TIVning kengaytirilgan hay’at yig‘ilishida vazirlik tarkibiy bo‘linmalariga yangi tayinlangan rahbarlarni tanishtirdi. Bu haqda “Dunyo” agentligi xabar berdi.
O‘zbekistonning Birlashgan Arab Amirliklaridagi elchisi lavozimida ishlagan Baxtiyor Ibragimov vazirlik Iqtisodiy diplomatiya departamenti direktori lavozimiga tayinlangan.
Shuningdek, Davlat protokoli boshqarmasi bo‘lim boshlig‘i bo‘lib ishlab kelayotgan Sarvar Mirzarahimov mazkur boshqarma boshlig‘i vazifasini bajaruvchi lavozimiga tasdiqlangan.
Tashqi ishlar vazirligi Moliya-iqtisodiyot boshqarmasi bosh mutaxassisi Umid Akromov esa Iqtisodiy ta’minot bo‘limi boshlig‘i vazifasini bajaruvchi lavozimiga tayinlangan.
Avvalroq Abdulaziz Komilov Saudiya Arabistoni tashqi ishlar vaziriga tabrik yo‘llagani, O‘zbekistonda diplomatik missiyasini yakunlayotgan Falastin va Janubiy Koreya elchilarini qabul qilgani to‘g‘risida xabar berilgandi.
Izoh (0)