Toshkentdagi qator Davlat xizmatlari markazlarida haydovchilik guvohnomasini almashtirmoqchi bo‘lganlar uchun “so‘nggi mijozgacha” ish rejimi joriy etilgani to‘g‘risida xabar berilgandi. Davlat xizmatlari agentligining ma’lum qilishicha, respublikaning qator viloyatlarida ham shu kabi ish rejimi joriy etilgan.
Ta’kidlanishicha, Farg‘ona, Marg‘ilon, Qo‘qon, Buxoro, Samarqand, Jizzax, Termiz, Qarshi, Guliston, Namangan, Xiva, Navoiy shaharlari hamda Andijon, Shahrisabz, Qorako‘l tumanlari Davlat xizmatlari markazlari tomonidan ham eski haydovchilik guvohnomalarini yangi namunadagisiga almashtirish “so‘nggi mijozgacha” ish rejimiga asosan amalga oshiriladi.
Bunda, yuqorida qayd etilgan DXMlar orqali haydovchilar dushanba—juma kunlari ertalab soat 09:00 dan kechgacha hamda shanba kuni soat 09:00 dan 13:00 ga qadar xizmatdan foydalanishlari mumkin.
Aholiga qulay bo‘lishi uchun eski haydovchilik guvohnomasini yangi namunadagisiga almashtirishning so‘nggi muddati 2021-yili dekabr oyidan 2022-yil 31-dekabrga qadar uzaytirilgan va bu jarayon 4-bosqichda amalga oshirilishi belgilangan. Ya’ni
- 2010-yilgacha berilganlari — 2022-yil 31-martgacha,
- 2010—2012-yillarda berilganlari — 2022-yil 30-iyungacha,
- 2013—2015-yillarda berilganlari — 2022-yil 30-sentabrgacha,
- 2015-yildan keyin berilganlari — 2022-yil 31-dekabrgacha.
“Xizmat ko‘rsatish jarayonida IIV axborot tizimida ayrim holatlarda uzilishlar kuzatilishi mumkin. Sizlardan ham xizmatlardan foydalanishda tartibni saqlashingizni, navbatga rioya qilishingizni hamda o‘zaro hurmatni saqlab, sabrli bo‘lishingizni so‘rab qolamiz”, — deyiladi xabarda.
Avvalroq Toshkentdagi ikki YHXB bo‘limida eski namunadagi haydovchilik guvohnomalarini yangisiga almashtirish imkoni yaratilgani to‘g‘risida xabar berilgandi.
Mavzuga doir:
Izoh (0)