Ijtimoiy tarmoqlarda Andijon shahri hokimi Bahrom Haydarov qabuliga borgan OAV vakillari va hokimni himoya qilishga uringan ayol voqeasi aks etgan video tarqaldi. Tan olish kerak, video ko‘plab muhokamalarga sabab bo‘ldi. Kimdir hokimning OAV vakillariga shaxsan peshvoz chiqolmasligini qoralagan bo‘lsa, yana kimdir ayolning qilmishi noto‘g‘ri ekanini yozdi.
“Daryo” muxbiri mazkur voqea sabab viloyatda faoliyat yurituvchi jurnalist va blogerlarga yuzlanib, hududda Andijon shahri hokimidek OAV vakillariga shaxsan peshvoz chiqishdan qo‘rqadigan va OAV vakillari bilan muloqot qilishdan cho‘chimaydigan hokimlar haqida so‘radi.
“Sevimli” kanali “Zamon” informatsion dasturining Andijon viloyati bo‘yicha muxbiri Gulzira Rustamovaning aytishicha, u muammolarni o‘rganish davomida mas’ullar, shaxsan hokimlar bilan muloqot qilishda ancha qiynaladi.
“Jurnalist sifatida ish boshlaganimga qisqa vaqt bo‘ldi. Murojaatlarni o‘rganishda, albatta, hokim va hokimlik vakillari bilan muloqot qilishimizga to‘g‘ri keladi. To‘g‘risini aytsam, faoliyatim davomida hokimlik vakillaridan intervyu olish ancha muammo ekanini tushunib yetganman. Hattoki, mas’ullardan izoh so‘rab, gap talashib qolgan holatlarimiz ham bo‘lgan. Albatta, shu o‘rinda tazyiqlar, turli gap so‘zlar ham bo‘lib turgan. Har narsaning og‘ir va yengil tomoni bo‘lgani kabi jurnalistikada ham bu holatlar bo‘ladi va bular sohaning og‘ir tomoni deb bilganman”, — deydi Gulzira Rustamova.
Gulzira Rustamova hokimlar orasida Xo‘jaobod tumani hokimi — Otabek Rasulov bilan muloqot qilish qiyinligini, hokim OAV vakillariga shaxsan peshvoz chiqolmasligini aytmoqda.
“Dehqonning yer bilan bog‘liq muammosini o‘rgangach, tuman hokimidan izoh olish uchun uni kechgacha kutishga majbur bo‘lganmiz. Hokimni kechki soat 22:00 ga qadar kutgan bo‘lsak-da, savollarimizga javob olish imkoni bo‘lmagan. Hokimning shaxsan o‘zi biz bilan muloqotdan qochgan. Hokimiyat vakillari esa ‘o‘rganamiz’, ‘hal qilib beramiz’, deyishdan nariga o‘tmagan”, — deydi jurnalist.
Gulzira Rustamova Jalaquduq tumani hokimi Hikmatilla Latipov ham OAVdan qochuvchi hokim ekanini aytmoqda.
“Bir murojaat yuzasidan Jalaquduq tumaniga bordik. Ish davomida tuman mahalla va oilani qo‘llab-quvvatlash bo‘limi vakili yonimga kelib, aholi nima maqsadda murojaat qilgani-yu, mening maqsadim va nima xohlayotganim bilan qiziqdi. Aytishicha, uni hokim yuborgan ekan. Keyinchalik hokimlik vakillari murojaatchilarga ham bosim o‘tkazib, ‘tuman hokimi muammolaringizni hal qilib bermaydi, boisi sizlar televideniyega murojaat qilgansiz. Muammongizni ular hal qilib berishsin’, deyishgan ekan”, — deydi TV jurnalisti.
TV jurnalistining qo‘shimcha qilishicha, Izboskan tuman hokimi Serobiddin Ismoilov ham OAV vakillari bilan muloqotda juda ehtiyotkor.
“Izboskan hokimi bilan suhbat qurganimizda u ovozini yozib olmasligimiz kerakligini ta’kidlagan. Juda ehtiyotkor inson ekan. Shuningdek, u OAV vakillaridan ochiqchasiga qochgan. Undan intervyu olishda juda qiynalganman. Marhamat tumani hokimi Bobur Yo‘ldoshev ham OAV vakillaridan qochadigan hokimlar sirasiga kiradi. Ikki-uch kun Marhamat tumani hokimligida bo‘lib, nafaqat hokimni, hatto mas’ullarni ham topolmaganmiz. Axiri hokimlik binosini tasvirga olib qaytayotganimizda hokim o‘rinbosari yonimizga kelib, juda qo‘pol munosabatda bo‘lgan. Shahrixon tumani hokimi Hikmatilla Dadaxonov esa kameradan qochmagan, savollarimizga dadil-dadil javob bergan. Ammo hammasi yakunlanganidan so‘ng, murojaatchiga tazyiq o‘tkazib, agar lavha efirga ketsa ishini hal qilib bermasligini aytgan. Tadbirkor esa hokimdan qo‘rqib, lavhani efirga bermasligimizni so‘ragan”, — deydi Gulzira Rustamova.
TV jurnalisti faoliyati davomida hokimlar nomidan pul taklif qilish, bosim o‘tkazish yoki kimlarnidir o‘rtaga qo‘shib, qo‘ng‘iroq qilish holatlari ko‘p uchrashini aytmoqda.
“Faoliyatim davomida shahar va tuman hokimlari tomonidan matbuot anjumanlari o‘tkazish, jurnalistlarning savollariga ochiq-oydin javob berish holatlarini uchratmaganman. Tan olish kerak, viloyat hokimi bu borada ancha faol. U har qanday holatda ham intervyu berishdan qochmaydi. Biroq uning atrofidagilar turli bahonalar qilib jurnalistlarning viloyat hokimi bilan yuzma-yuz kelishiga to‘sqinlik qilib kelishadi”, — deydi Gulzira Rustamova.
“Kun.uz” internet nashrining Farg‘ona vodiysi bo‘yicha maxsus muxbiri Elmurod Ermatov Andijondagi barcha hokimlar OAV vakillari uchun ochiq ekanini aytmoqda.
“Hokimlarning OAV vakillariga qanchalik ochiqligi haqidagi savol jurnalistlarni doimo qiziqtirib kelgan. Men “Kun.uz” saytining vodiy bo‘yicha muxbiri sifatida hech ikkilanmasdan aytamanki, Andijon hokimlari jurnalistlardan qochmaydigan hokimlar hisoblandi. Masalan, Baliqchi tumani hokimi Jasurbek Abduraimov OAV uchun har doim ochiq va muloqotga tayyor. Qachon borsak o‘zi kutib oladi va biz bilan birga muammoni hal qilishga urinadi. Jarayonlar davomida holatdan xabardor bo‘lib turadi. Tanqidni ham ko‘tara oladi. Lekin tanqidni ko‘tarolmaydigan hokimlar ham bor. Misol uchun, Ulug‘nor tuman hokimi Islomiddin aka. Yaqinda Ulug‘nor tumanida fermerlarning klasterlar bilan shartnoma tuzishida tuman hokimining xalal berayotgani haqida jurnalistik surishtiruv o‘tkazdim. Bu mavzudagi maqola saytimizda namoyish qilinganidan so‘ng fermerlar hokim oldiga borgani, ammo tuman hokimi “Sizlardan arazladim, meni butun respublikaga sharmanda qildinglar”, deb ularni qabul qilmaganini eshitdim”, — deydi Elmurod Ermatov.
Elmurod Ermatovning aytishicha, Qo‘rg‘ontepa tuman hokimi Elyor Nabijonov bilan to‘g‘ridan to‘g‘ri aloqaga chiqish va ko‘rishish muammo emas. Xonobod shahri hokimi Mash’albek Tojiboyev va Izboskan tumani hokimi Serobiddin Ismoilovlar ham OAV vakillari izlagan paytda ko‘rinish beradi”, — deydi Elmurod Ermatov.
“Kun.uz” muxbiri hududdagi hokimlarning OAV vakillariga qanchalik ochiq va shaffof bo‘lishi ularning matbuot kotiblariga ham bog‘liqligini aytib, viloyatda faoliyat yuritayotgan hokimlik matbuot kotiblarining aksariyati o‘z ishini eplolmayotganini bildirmoqda.
Ijtimoiy tarmoqlar faoli, bloger Otabek Nuriddinov “Daryo” muxbiri bilan suhbatda Asaka va Andijon shahri hokimi OAV, xususan, blogerlar uchun doim ochiq ekanini aytmoqda.
“Asaka tumani hokimi Mansur Alixonov hamda Andijon shahri hokimi Bahrom Haydarovlar OAV vakillari uchun hamisha ochiq. Ulardan to‘g‘ridan to‘g‘ri izoh olish mumkin. Mening nazarimda OAV uchun yopiq hokimlar Shahrixon tumani hokimi Hikmatilla Dadaxonov va Andijon tumani hokimi Abdujabbor Egamberdiyev hisoblanadi. Bular bilan bog‘lanish ham, muloqot qilish ham qiyin”, — deydi Otabek Nuriddinov.
“Daryo” muxbiri bu masalada bosma ommaviy axborot vositalari — gazeta jurnalistlari bilan ham suhbatlashdi. Ular hokimlar jurnalist va blogerlar bilan doimo yaxshi munosabatda bo‘lishini bildirib, har qanday holatda ham ishi hokimliklarning matbuot kotiblari orqali bitishini, hokimlar bilan shaxsan hech qachon bog‘lanmaganini, ro‘baro‘ kelmaganini aytgan.
“Daryo” hududlardagi hokimlarning OAVga ochiqligini o‘rganishda davom etadi.
Izoh (0)