Shavkat Mirziyoyev Qozog‘istondagi O‘zbekiston elchixonasining yangi binosi ochilishida qatnashdi

Shavkat Mirziyoyevning Qozog‘istonga tashrifi davomida 6-dekabr kuni Nur-Sultonda O‘zbekiston elchixonasi yangi binosining ochilish marosimi bo‘lib o‘tdi. Bu haqda Prezident matbuot xizmati xabar qildi.

Ma’lum qilinishicha, Shavkat Mirziyoyev va Qosim-Jo‘mart To‘qayev ramziy bog‘ichni kesib, yangi binoni ochib bergan. Ikki mamlakat madhiyalari yangragan. Prezidentlar elchixonada yaratilgan sharoitlar bilan tanishgan.

Qayd etilishicha, zamonaviy bino o‘zbekistonlik quruvchilar tomonidan qurilgan, xonalar milliy uslubda bezatilgan. Diplomatik vakolatxona hududida asosiy bino, konsullik bo‘limi, xodimlar uchun uy, diplomatik missiya rahbarining qarorgohi, kutubxona, bolalar va sport maydonchalari joylashgan.

Muzokara xonalari, anjumanlar zalida barcha sharoitlar mavjud. Interfaol uskunalar muzokaralarni onlayn shaklda o‘tkazish imkonini beradi. Konsullik faoliyati uchun elektron navbat tizimi o‘rnatilgan.

Davlat rahbarlari elchixonaning Faxriy mehmonlar kitobida qayd yozib qoldirgan.

Eslatib o‘tamiz, Shavkat Mirziyoyev 5-dekabr kuni Qosim-Jo‘mart To‘qayevning taklifiga binoan Qozog‘istonga jo‘nab ketgandi. Uni Nur-Sultonda Qozog‘iston prezidenti kutib oldi.

Tashrif chog‘ida Oq o‘rdada Shavkat Mirziyoyev va Qosim-Jo‘mart To‘qayev tor doirada muzokaralar o‘tkazdi va ikki tomonlama hamkorlikning muhim vazifalarini belgilab oldi. Shuningdek, Shavkat Mirziyoyev Nur-Sultondagi “Vatan himoyachilari” monumentiga gul qo‘ydi va O‘zbekiston va Qozog‘iston o‘rtasida ittifoqchilik munosabatlari to‘g‘risidagi deklaratsiya imzolandi. Bundan tashqari, Shavkat Mirziyoyev Nursulton Nazarboyev bilan uchrashdi.