“O‘zgidromet” haftalik ob-havo prognozini e’lon qildi.
Unga ko‘ra, 28-fevral kuni O‘zbekiston hududiga Kavkaz hududlaridan nam havo massasi kirib kelishi hisobiga respublika bo‘yicha ba’zi joylarda yomg‘ir yog‘adi, tog‘li hududlarda qor yog‘adi, faqat Farg‘ona vodiysi viloyatlarida yog‘ingarchilik kutilmaydi. Ba’zi joylarda shamol tezligi 15-20 metr/sekundgacha kuchayishi mumkin. Havo harorati 13-18 daraja iliq atrofida bo‘ladi.
1-mart, seshanba kuni respublika hududining katta qismida yomg‘ir yog‘ishi davom etadi, ammo yomg‘ir kuchsiz bo‘ladi. Respublikaning shimolida yog‘ingarchilik to‘xtaydi.
2-mart, chorshanba kuni nam havo massasi sharqqa tomon siljiydi, faqat Toshkent viloyati va Farg‘ona vodiysi viloyatlarida kechasi va ertalab yomg‘ir yog‘ishi saqlanib turadi. Ushbu kunda kunduzi havo harorati bulutli bo‘ladi va 12-17 daraja iliqdan yuqori bo‘lmaydi.
Haftaning ikkinchi yarmidan O‘zbekistonga Eron hududlaridan juda iliq havo kirib kelishi kutilmoqda. Buning natijasida yog‘ingarchiliksiz juda iliq ob-havo bo‘ladi. Havo harorati kunduz kunlari 18-23 daraja iliqqacha, janubda va cho‘l hududlarida 25-27 daraja iliqqacha ko‘tariladi. Qayd etilishicha, bu shu kunlarning iqlimiy me’yorlaridan 10-12 darajaga yuqoridir.
Juda iliq havoni shiddatli kirib kelishi 4-mart kuni shamolning 15-20 metr/sekundgacha kuchayishiga sabab bo‘lishi mumkin.
28-fevralda respublikaning tog‘li hududlarida qor ko‘chishi xavfi bor.
Izoh (0)