O‘zbekiston tashqi ishlar vaziri Abdulaziz Komilov Xorvatiya va Estoniyaning favqulodda va muxtor elchilari (qarorgohi Nur-Sulton shahrida) etib tayinlangan Refik Shabanovich va Toomas Tirsni qabul qildi.

Foto: Tashqi ishlar vazirligi

Vazir ishonch yorliqlarini qabul qilar ekan, elchilarni yangi lavozimga tayinlangani bilan tabrikladi va mas’uliyatli lavozimida muvaffaqiyatlar tiladi.

Suhbat chog‘ida ikki tomonlama va “O‘zbekiston—Yevropa Ittifoqi” shaklida O‘zbekiston—Xorvatiya va O‘zbekiston—Estoniya munosabatlarining dolzarb masalalari muhokama qilindi.

Foto: Tashqi ishlar vazirligi

Siyosiy-diplomatik, savdo-iqtisodiy, sarmoyaviy, madaniy-gumanitar va boshqa sohalarda o‘zaro manfaatli aloqalarni kengaytirish bo‘yicha amaliy takliflar ko‘rib chiqildi.

Mintaqadagi hozirgi vaziyat yuzasidan fikr almashildi.

Bundan avval Abdulaziz Komilov Saudiya Arabistonining O‘zbekistondagi yangi elchisini qabul qilgani, Shavkat Mirziyoyev O‘zbekistonning Tojikistondagi elchisini “Do‘stlik” ordeni bilan mukofotlagani hamda O‘zbekistonning Misrdagi yangi elchisi tayinlangani haqida xabar berilgandi.