Жанубий Корея ва Сингапур Россияга нисбатан экспорт назоратини кучайтириб, Москвага қарши халқаро санкцияларга қўшилди, деб хабар беради Reuters.
Жанубий Корея ҳукумати Россияга экспорт қилинадиган стратегик материалларга тақиқ жорий этади. Мамлакат, шунингдек, халқаро энергетика бозорини барқарорлаштириш учун стратегик нефть захираларини қўшимча равишда бўшатишга кўмаклашиш ва суюлтирилган газни Европага қайта сотиш каби бошқа чораларни кўриб чиқишга қарор қилган.
«Жанубий Корея Украина атрофидаги вазият туфайли Россияни SWIFT тўлов тизимидан узиб қўйиш борасидаги халқаро қарорга қўшилишга тайёр. Бундан ташқари, мамлакат Россияга стратегик материалларни экспорт қилишни тақиқлашга қарор қилди», — дейилади Жанубий Корея ТИВ баёнотида.
Вазирликнинг таъкидлашича, Сеул Россияни SWIFT тўлов тизимидан узиш тўғрисидаги қарори ҳақида АҚШни огоҳлантириб, Жанубий Корея Украинага гуманитар ёрдамни кучайтиришини қўшимча қилган.
Сингапур эса ўз навбатида айрим Россия банкларини ва Россия билан боғлиқ молиявий операцияларни блоклашни, экспорт устидан назоратни кучайтиришга қарор қилган.
Сингапур ташқи ишлар вазири Вивиан Балакришнан мамлакат Украинада фуқароларга қарши қурол сифатида фойдаланилиши мумкин бўлган буюмларга экспорт назорати ўрнатишини маълум қилган. Ҳозирда аниқ чоралар ишлаб чиқилмоқда ва яқин вақтлар ичида эълон қилинади.
«Россия билан яхши муносабатларимизни қадрлашни давом этамиз. Бироқ биз бошқа бир давлатнинг суверенитети ва ҳудудий яхлитлигининг бузилишига тоқат қила олмаймиз», — дейди вазир.
Эслатиб ўтамиз, Украинага ҳужум сабаб Осиёда биринчи бўлиб Япония Россияга қарши санкцияларни киритди. Япония санкцияларига кўра, Донбасс республикалари вакилларига виза бериш тўхтатилади ва уларнинг капиталлари музлатилади, мазкур республикалар билан экспорт-импорт муносабатлари, шунингдек, Россия ҳукуматининг янги суверен қарзи бўйича операциялар тақиқланади.
Изоҳ (0)