Belarusning Ukraina bilan chegarasi yaqinida joylashgan Gomel viloyati, Pripyat daryosi bo‘yidagi qarorgohda Rossiya va Ukraina delegatsiyalari o‘rtasida muzokaralar boshlandi.
Moskvadan kelgan delegatsiyaga prezident yordamchisi, Rossiya sobiq madaniyat vaziri Vladimir Medinskiy boshchilik qilmoqda. Shuningdek, uning tarkibidan Tashqi ishlar vazirligi, Mudofaa vazirligi va prezident ma’muriyati vakillari o‘rin olgan.
Ukraina delegatsiyasi esa Oliy Radadagi hukmron “Xalq noibi” partiyasi fraksiyasi rahbari David Araxamiya, Ukraina mudofaa vaziri Oleksiy Reznikov va Ukraina prezidenti ofisi rahbarining maslahatchisi Mixail Podolyakdan iborat.
Zelenskiy ofisining axborotiga ko‘ra, muzokaralarning asosiy masalasi “zudlik bilan o‘t ochishni to‘xtatish va Rossiya qo‘shinlarini Ukraina hududidan olib chiqib ketish”dir.
“Mojaro davom etayotgan har soatda Ukraina fuqarolari, ukrainalik askarlar halok bo‘layotgani sababli, biz, albatta, imkon qadar tezroq birorta kelishuvga erishishdan manfaatdormiz. Bu kelishuvlar, shubhasiz, har ikki tomon manfaatlariga mos kelishi kerak”, — dedi Medinskiy.
24-fevral kuni Ukrainaga Rossiya bosqini boshlanganidan bir necha soat o‘tib, Belarus prezidenti Aleksandr Lukashenko tomonlarni Minskda muzokara o‘tkazishga taklif qilgandi. 25-fevral kuni Ukraina prezidenti ofisining vakili va Zelenskiyning o‘zi muzokara o‘tkazish taklifi bilan chiqdi.
Dastlab Ukraina tomoni muzokaralar uchun Varshavani muqobil variant sifatida taklif qilib, Minskka uchishdan bosh tortdi. Oxir-oqibat tomonlar Belarus-Ukraina chegarasidagi Gomel viloyatida uchrashishga kelishib oldi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)