Rossiya Markaziy banki zudlik bilan asosiy stavkani 20 foizgacha oshirdi. Bu haqda Forbes nashri xabar bermoqda.
Regulyator ushbu qarorni Rossiya iqtisodiyoti uchun tashqi sharoitlarning tubdan o‘zgarishi bilan izohladi va stavkaning oshishi moliyaviy va narx barqarorligini saqlashga yordam berishi aytilmoqda.
Qayd etilishicha, Rossiya Markaziy banki asosiy stavka bo‘yicha keyingi qarorlarni tashqi va ichki sharoitlardan kelib chiqadigan risklarni hamda maqsadli ko‘rsatkichga nisbatan inflyatsiyaning amaldagi va kutilayotgan dinamikasini hisobga olgan holda qabul qiladi.
2014-yilda Qrim voqealari davrida ham Rossiyada asosiy stavka bundan pastroq edi — 17 foiz.
Asosiy stavka nima o‘zi?
Asosiy stavka pul-kredit siyosatining asosiy vositalaridan biri hisoblanadi. 2020-yilgacha uning o‘rnida qayta moliyalash stavkasi amal qilgan.Ushbu stavka boshqa stavkalarga (masalan, kreditlar yoki depozitlar bo‘yicha), shuningdek, aholi va korxonalarning iste’mol va investitsiya qarorlariga qarab belgilanadi. Bularning barchasi ichki talab va inflyatsiyaga ta’sir qiladi.
Shu tariqa, stavka darajasi, odamlar nima bilan shug‘ullanishidan qat’i nazar, barchaga, qayerdadir to‘g‘ridan to‘g‘ri, qayerdadir bilvosita, o‘z ta’sirini o‘tkazadi.
Asosiy stavka nimaga ta’sir qiladi?
U bank xizmatlari va mahsulotlariga bevosita ta’sir qiladi. Banklar ushbu stavka asosida omonat va kreditlar narxini o‘zgartiradi.Agar asosiy stavka ko‘tarilgan bo‘lsa, kreditlar va depozitlar bo‘yicha stavkalar ham ko‘tariladi, chunki sarmoya jalb qilish xarajatlari oshadi.
Asosiy stavka tushgan taqdirda, katta ehtimol bilan kreditlar va depozitlar bo‘yicha stavkalar ham pasayadi, chunki sarmoya jalb qilish arzonlashadi.
Kredit berishda asosiy stavka banklar tomonidan bog‘lanishi mumkin, foizlarni to‘lash miqdori esa asosiy stavka darajasiga qarab o‘zgaradi.
Hozirda O‘zbekistonda asosiy stavka — 14 foiz.
Avvalroq rubl tarixdagi eng minimal darajaga tushib ketgani haqida xabar berilgan edi.
Izoh (0)