Norvegiya, Uels va Shveysariya ham Rossiya terma jamoasini JCh—2022 o‘tish o‘yinlaridan chetlashtirish fikrini qo‘llab-quvvatladi

Ukrainada bilan bog‘liq vaziyat tufayli yana bir nechta futbol assotsiatsiyalari Rossiya bilan o‘ynashdan bosh tortmoqda.

“Shvetsiya, Polsha va Chexiyaning pozitsiyasini qo‘llab-quvvatlaymiz. Rossiya bilan o‘yinlar o‘tkazish mutlaqo noo‘rin”, — deydi Norvegiya futbol ittifoqi rahbari Terye Svendson.

Uels futbol assotsiatsiyasi ham xuddi shunday bayonot bilan chiqdi.

“Uels futbol assotsiatsiyasi Ukrainada bo‘lib o‘tayotgan voqealardan qayg‘uda. Biz yaqin kelajakda Rossiya bilan hech qanday musobaqalarda xalqaro miqyosdagi o‘yin o‘tkazmaslikka qaror qildik”, — deyiladi bayonotda.

Shveysariya futbol ittifoqi ham Ukraina bilan bog‘liq vaziyat tufayli bayonot berdi.

“Bu nafaqat xalqaro huquqni, balki FIFAda mustahkamlangan do‘stona munosabatlarni rivojlantirish kabi futbolning umuminsoniy qadriyatlarini qo‘pol ravishda buzishdir.

Ukrainada jarohatlanganlar, ayniqsa, Ukraina futbol assotsiatsiyasi va uning a’zolaridan xavotirdamiz.

Shveysariya futbol ittifoqi Rossiyani Qatarda bo‘lib o‘tadigan JCh—2022 saralashidan chetlashtirishni talab qilayotgan Polsha, Shvetsiya va Chexiya federatsiyalari fikrini qo‘llab-quvvatlaydi”, — deydi shveysariyaliklar o‘z bayonotida.

Avvalroq Polsha, Shvetsiya va Chexiya Rossiyaga qarshi o‘yinda ishtirok etishdan bosh tortgandi. Uchala tomon ham bunga Ukrainadagi jangovar harakatlarni sabab qilib ko‘rsatgan. Shuningdek, Angliya futbol assotsiatsiyasi ham mamlakat terma jamoalarining Rossiya terma jamoalari bilan o‘ynamasligini ma’lum qilgandi.

24-fevral kuni Rossiya prezidenti Vladimir Putin Donbassda “maxsus harbiy operatsiya” boshlanganini e’lon qildi. Ayni vaqtda Ukrainaning qator hududlarida harbiy harakatlar davom etmoqda.