Украинада билан боғлиқ вазият туфайли яна бир нечта футбол ассоциациялари Россия билан ўйнашдан бош тортмоқда.
«Швеция, Польша ва Чехиянинг позициясини қўллаб-қувватлаймиз. Россия билан ўйинлар ўтказиш мутлақо ноўрин», — дейди Норвегия футбол иттифоқи раҳбари Терье Свендсон.
Уэльс футбол ассоциацияси ҳам худди шундай баёнот билан чиқди.
«Уэльс футбол ассоциацияси Украинада бўлиб ўтаётган воқеалардан қайғуда. Биз яқин келажакда Россия билан ҳеч қандай мусобақаларда халқаро миқёсдаги ўйин ўтказмасликка қарор қилдик», — дейилади баёнотда.
Швейцария футбол иттифоқи ҳам Украина билан боғлиқ вазият туфайли баёнот берди.
«Бу нафақат халқаро ҳуқуқни, балки ФИФАда мустаҳкамланган дўстона муносабатларни ривожлантириш каби футболнинг умуминсоний қадриятларини қўпол равишда бузишдир.
Украинада жароҳатланганлар, айниқса, Украина футбол ассоциацияси ва унинг аъзоларидан хавотирдамиз.
Швейцария футбол иттифоқи Россияни Қатарда бўлиб ўтадиган ЖЧ—2022 саралашидан четлаштиришни талаб қилаётган Польша, Швеция ва Чехия федерациялари фикрини қўллаб-қувватлайди», — дейди швейсарияликлар ўз баёнотида.
Аввалроқ Польша, Швеция ва Чехия Россияга қарши ўйинда иштирок этишдан бош тортганди. Учала томон ҳам бунга Украинадаги жанговар ҳаракатларни сабаб қилиб кўрсатган. Шунингдек, Англия футбол ассоциацияси ҳам мамлакат терма жамоаларининг Россия терма жамоалари билан ўйнамаслигини маълум қилганди.
24 февраль куни Россия президенти Владимир Путин Донбассда «махсус ҳарбий операция» бошланганини эълон қилди. Айни вақтда Украинанинг қатор ҳудудларида ҳарбий ҳаракатлар давом этмоқда.
Изоҳ (0)