Qariyb bir yil avval, 2021-yilning aprel oyida O‘zbekiston maxsus GSP+ preferensiyalar tizimiga qo‘shilgan edi.
“Daryo”ga ma’lum bo‘lishicha, buning natijasida 2021-yilda o‘zbek tovarlarini Yevropaga eksport qilish hajmi 30 foizga oshgan.
Gazlamalar, plastik materialdan ishlangan narsa-buyumlar kabi bir qator eksport tovarlariga joriy qilingan tariflarning bekor qilinishi sabab GSP+ sxemasi Yevropa Ittifoqi va O‘zbekiston o‘rtasida qo‘shimcha imkoniyatlarni yaratmoqda.
GSP tizimi O’zbekiston uchun Yevropa Ittifoqiga bojxona bojlarisiz 3000 ta va kamaytirilgan stavkalar bo‘yicha 3200 ta tovarni eksport qilish imkoniyatini yaratgan edi. GSP+ orqali esa bojxona to‘lovlarisiz 6200 ta tovarni olib o‘tish imkoniyati paydo bo‘ldi.
Bugungi kunda O‘zbekiston Yevropa Ittifoqi bozoriga sezilarli yaqinlashgan bo‘lsa-da, savdo salohiyati hali yetarli darajada emas. Iqtisodiy blok esa mamlakatning eksport yo‘nalishlari ro‘yxatida yettinchi o‘rinni egallab turibdi.
Nafaqat savdo, balki undan ortig‘i…
GSP+ — savdo vositasidan ham kengroq tushuncha. Tizimga a’zo davlatlar inson huquqlari, atrof-muhit muhofazasi va hokazolar bo‘yicha 27 ta asosiy xalqaro konvensiyani bajarishlari kerak.
Kuni kecha Oliy Majlis Senati raisi Tanzila Norboyevaning Yevroparlament Tashqi ishlar qo‘mitasi raisi Devid Makalister boshchiligidagi delegatsiya bilan bo‘lib o‘tgan uchrashuvida shu masala ham ko‘ndalang qo‘yildi.
Uchrashuvda O‘zbekiston o‘z majburiyatlarini bajarish uchun zaruriy choralar ko‘rayotgani ta’kidlandi. Buning uchun parlament nazorati yo‘lga qo‘yilgan.
GSP+ dan samarali foydalanish savdo-sotiq va iqtisodiy munosabatlarni hamda O‘zbekiston va Yevropa biznes vakillari o‘rtasidagi o‘zaro daromadli aloqalarni kengaytirish imkoniyatini yaratadi.
Izoh (0)