Қарийб бир йил аввал, 2021 йилнинг апрель ойида Ўзбекистон махсус GSP+ преференциялар тизимига қўшилган эди.
«Дарё»га маълум бўлишича, бунинг натижасида 2021 йилда ўзбек товарларини Европага экспорт қилиш ҳажми 30 фоизга ошган.
Газламалар, пластик материалдан ишланган нарса-буюмлар каби бир қатор экспорт товарларига жорий қилинган тарифларнинг бекор қилиниши сабаб GSP+ схемаси Европа Иттифоқи ва Ўзбекистон ўртасида қўшимча имкониятларни яратмоқда.
GSP тизими Ўзбекистон учун Европа Иттифоқига божхона божларисиз 3000 та ва камайтирилган ставкалар бўйича 3200 та товарни экспорт қилиш имкониятини яратган эди. GSP+ орқали эса божхона тўловларисиз 6200 та товарни олиб ўтиш имконияти пайдо бўлди.
Бугунги кунда Ўзбекистон Европа Иттифоқи бозорига сезиларли яқинлашган бўлса-да, савдо салоҳияти ҳали етарли даражада эмас. Иқтисодий блок эса мамлакатнинг экспорт йўналишлари рўйхатида еттинчи ўринни эгаллаб турибди.
Нафақат савдо, балки ундан ортиғи…
GSP+ — савдо воситасидан ҳам кенгроқ тушунча. Тизимга аъзо давлатлар инсон ҳуқуқлари, атроф-муҳит муҳофазаси ва ҳоказолар бўйича 27 та асосий халқаро конвенцияни бажаришлари керак.
Куни кеча Олий Мажлис Сенати раиси Танзила Норбоеванинг Европарламент Ташқи ишлар қўмитаси раиси Дэвид Макалистер бошчилигидаги делегация билан бўлиб ўтган учрашувида шу масала ҳам кўндаланг қўйилди.
Учрашувда Ўзбекистон ўз мажбуриятларини бажариш учун зарурий чоралар кўраётгани таъкидланди. Бунинг учун парламент назорати йўлга қўйилган.
GSP+ дан самарали фойдаланиш савдо-сотиқ ва иқтисодий муносабатларни ҳамда Ўзбекистон ва Европа бизнес вакиллари ўртасидаги ўзаро даромадли алоқаларни кенгайтириш имкониятини яратади.
Изоҳ (0)