Venesuela Putinning DXR va LXRni tan olish qarorini to‘liq qo‘llab-quvvatladi. Rossiya — Venesuela munosabatlari haqida nimalar ma’lum?

Venesuela Rossiya prezidenti Vladimir Putinning Donbassda tinchlikni himoya qilishga qaratilgan chora-tadbirlarini to‘liq qo‘llab-quvvatlaydi. Bu haqda respublika prezidenti Nikolas Maduro Venezolana de Televisión telekanali efirida aytib o‘tdi.

“Venesuela Rossiyada tinchlikni saqlash, o‘z xalqi va vatanini jasorat bilan himoya qilishda prezident Vladimir Putinni to‘liq qo‘llab-quvvatlashini ma’lum qiladi”, —  dedi Maduro.

U, shuningdek, Rossiya va uning rahbariga qarshi global manipulyatsiya kampaniyalarini mag‘lub qilishga chaqirdi. “O‘zimizni ming marta takrorlangan yolg‘onga aldanib qolishimizga yo‘l qo‘ymaymiz. Putin tinchlik huquqi va o‘z xalqining qadr-qimmatini himoya qilishini yaxshi bilamiz”, — deya qo‘shimcha qildi Venesuela prezidenti.

21-fevral kuni Rossiya prezidenti Vladimir Putin DXR va LXR mustaqilligini tan oluvchi hujjatlarni, shuningdek, mazkur respublikalar rahbarlari Denis Pushilin va Leonid Pasechnik bilan do‘stlik, hamkorlik va o‘zaro yordam to‘g‘risidagi shartnomalarni imzoladi. Keyinchalik Federatsiya Kengashi hujjatni ratifikatsiya qildi.

Aksariyat xorijiy yetakchilar Putinning qaroriga salbiy munosabat bildirdi. Shu bilan birga, Suriya, qisman tan olingan Janubiy Osetiya va Abxaziya Rossiyaning LXR va DXR bo‘yicha qarorini qo‘llab-quvvatlashini ma’lum qildi.

Rossiya—Venesuela munosabatlari haqida

Vikipediya ma’lumotlariga ko‘ra, Rossiya—Venesuela munosabatlari diplomatik aloqalar, Rossiya va Venesuela o‘rtasidagi siyosiy, iqtisodiy va harbiy-texnik hamkorlikdan iborat. Rossiya Venesuelaning asosiy ittifoqchisi. Rossiyaning Venesuelaga moliyaviy yordami va kreditlari milliardlab dollarni tashkil etadi.

Rossiya imperiyasi va Venesuela o‘rtasidagi birinchi aloqalar 1857-yilda, Rossiya Venesuela Respublikasining mustaqilligini birinchilardan bo‘lib tan olgan paytda bog‘langan. 1917-yilgi Oktabr inqilobidan keyin Venesuela aksariyat Lotin Amerikasi davlatlari kabi Sovet Rossiyasi bilan uzoq vaqt diplomatik aloqalarni olib bormagan.

1996-yilda Rossiyaning o‘sha paytdagi tashqi ishlar vaziri Yevgeniy Primakovning Venesuela  poytaxti Karakasga tashrifi chog‘ida Rossiya Federatsiyasi va Venesuela Respublikasi o‘rtasida do‘stlik va hamkorlik to‘g‘risida shartnoma tuzildi.

Venesuela Abxaziya va Janubiy Osetiya mustaqilligini tan olgan, Birlashgan Millatlar Tashkilotining Bosh Assambleyasida ovoz berishda Rossiyani qo‘llab-quvvatlagan. 2008-yil noyabr oyida Rossiya davlati rahbarining Venesuelaga birinchi rasmiy tashrifi bo‘lib o‘tgan.

2014-yil 27-mart kuni Qrimdagi referendumni tan olmaslik bo‘yicha BMT Bosh Assambleyasida Venesuela qarshi ovoz bergan va shu tariqa Qrimdagi referendumni tan olib, Rossiyani qo‘llab-quvvatlagan.

Rossiya va Venesuela faol savdo va iqtisodiy hamkorlikni ham olib boradi. 2005-yilda Rossiyaning “Gazprom” Ochiq aksiyadorlik jamiyati tenderda g‘olib chiqib, Venesuela ko‘rfazidagi shelfda gaz qidirish va qazib olish uchun litsenziyani qo‘lga kiritdi.

2017-yilda Venesuelada prezident Nikolas Maduroga qarshi ommaviy noroziliklarning yangi to‘lqini boshlandi. Venesuela muxolifatini AQSh, Yevropa Ittifoqi va qator Lotin Amerikasi davlatlari qo‘llab-quvvatladi. Venesuelada iqtisodiy inqiroz davom etdi va 2017-yilda inflyatsiya 2616 foizni tashkil etdi. Shunday sharoitda Rossiya Venesuelaga katta iqtisodiy yordam qo‘lini cho‘zdi.

Venesuela Rossiya harbiy texnikasining eng yirik xaridorlaridan bir ham. 2005—2017-yillarda qurol-yarog‘ va texnika sotib olishning umumiy hajmi 11 milliard dollardan ortiqni tashkil etgan.

Rossiya Tashqi ishlar vazirligi G‘arbning Venesuela muxolifatini qo‘llab-quvvatlash haqidagi bayonotlarini bir necha bor tanqid qilib, ularni “suveren davlatning ichki ishlariga aralashish” deb atagan. Xususan, 2019-yilning 16-yanvarida 2018-yil yakunlari bo‘yicha o‘tkazilgan matbuot anjumanida TIV rahbari Sergey Lavrov shunday degandi: “Biz Venesuelaga harbiy aralashuvga ruxsat beruvchi bayonotlarni ham, endi AQSh Nikolas Maduroni emas, parlament spikerini Venesuela prezidenti sifatida tan olishi yoki tan olishni boshlashi mumkinligi haqidagi bayonotlarni ham eshitdik. Bularning barchasi shuni ko‘rsatadiki, Qo‘shma Shtatlardagi nomaqbul hukumatlarning inqirozidagi chiziq ularning Lotin Amerikasi va boshqa mintaqalardagi harakatlarining ustuvor yo‘nalishlaridan biri bo‘lib qolmoqda”.

Rossiya Tashqi ishlar vazirligi Venesuelada o‘zaro tushunishga hissa qo‘shadigan barcha davlatlar bilan hamkorlik qilishga tayyorligini ma’lum qilgan. TIV bayonotida mojaroga qurolli aralashuv “halokatli oqibatlarga olib kelishi” ta’kidlangan.