Germaniyada Rossiya prezidenti Vladimir Putinning siyosatiga qarshi o‘tkazilgan norozilik namoyishlariga 600 dan ortiq odam chiqdi. Ular Rossiya elchixonasi yonida to‘plangan, deb xabar beradi “Ukrinform”.
“Putin, Donbassdan nari ket!”, “Putin, to‘xta!”, “Urushni to‘xtat!” yozuvlari tushirilgan plakatlarini ko‘tarib olgan faollar Ukraina suvereniteti va hududiy yaxlitligining buzilishiga qarshi norozilik bildirgan.
Ular Rossiya qo‘shinlarini Ukrainaning egallab olingan hududlaridan olib chiqib ketishni, Ukrainaga mudofaa qurollanishini taqdim etishni, Putin hamda uning oligarx-do‘stlariga qarshi sanksiyalar qo‘llash, shuningdek, “Shimoliy oqim-2” gaz quvurini butunlay to‘xtatishni talab qilmoqda.
Germaniya kansleri Olaf Sholsning ma’lum qilishicha, mamlakat hukumati “Shimoliy oqim-2” gaz quvurining sertifikatini to‘xtatadi. Kansler Germaniya Iqtisodiyot vazirligiga bu boradagi tegishli ko‘rsatmani bergan.
Shu bilan birga, kansler Rossiyaning DXR va LXRni tan olishiga munosabat maqsadli va mustahkam bo‘lishini, Moskvaning harakatlari esa oqibatsiz qolmasligini ta’kidlagan. Shuningdek, Olaf Shols Germaniya “Normand formati”ni muhim deb hisoblashini va uni Fransiya bilan birgalikda qo‘llashda davom etishini ma’lum qilgan.
Rossiya prezidenti Vladimir Putin 21-fevral kuni Xavfsizlik kengashi yig‘ilishida DXR va LXR mustaqilligini e’lon qilish taklif etilganidan keyin, mamlakat fuqarolariga murojaat yo‘lladi va respublikalarning mustaqilligini tan olish haqidagi farmonni imzoladi. 22-fevral kuni Rossiya davlat dumasi va federatsiya kengashi ushbu farmonni ratifikatsiya qildi.
Shundan so‘ng, Bayden DXR va LXR mustaqilligini tan olgan Rossiyaga qarshi sanksiyalar e’lon qildi. Shuningdek, Yaponiya, Kanada va Avstraliya DXR va LXRning tan olinishi sabab Rossiyaga qarshi qator sanksiyalarni joriy etdi.
Izoh (0)