Ukraina Milliy xavfsizlik va mudofaa kengashi (MXMK) Donetsk va Lugansk viloyatlaridan tashqari butun mamlakat bo‘ylab favqulodda holat joriy etishga qaror qildi. Bu haqda kengash kotibi Aleksey Danilovga tayanib, “UNIAN” xabar berdi.
Endi Milliy xavfsizlik kengashining qarori 48 soat ichida Ukraina Oliy Radasi tomonidan tasdiqlanishi kerak.
Danilovning so‘zlariga ko‘ra, favqulodda holat 30 kunga joriy qilinadi, zarurat tug‘ilsa, Ukraina prezidenti uni yana 30 kunga uzaytirishi mumkin.
Favqulodda holat sharoitida jamoat tartibi kuchaytirilishi va transport harakati cheklanishi mumkin, dedi Danilov. Uning so‘zlariga ko‘ra, komendantlik soati ayrim hududlarda faqat zarurat tug‘ilganda – Rossiya tomonidan tajovuz kuchaygan taqdirda joriy etiladi.
MXMK kotibi favqulodda holat joriy etilishi ukrainaliklar hayotiga “radikal” ta’sir ko‘rsatmasligiga ishontirdi. Uning qo‘shimcha qilishicha, agar kerak bo‘lsa, Ukrainada harbiy holat joriy qilinadi.
Avvalroq Ukraina Tashqi ishlar vazirligi mamlakat fuqarolariga Rossiyaga borishdan cheklanishni, u yerda bo‘lib turganlarga esa mamlakatni zudlik bilan tark etishni tavsiya qilgan.
Vazirlik saytida qayd etilishicha, bu choralar “Rossiyaning Ukrainaga qarshi agressiyasi kuchayishi munosabati bilan” taklif qilingan. “Ushbu tavsiyalarga e’tiborsizlik Rossiyada Ukraina fuqarolari uchun tegishli himoyani ta’minlashni sezilarli darajada qiyinlashtiradi”, — deyiladi TIV bayonotida.
Mavzuga doir:
- BMT bosh kotibi: Donbassda sodir bo‘layotgan voqealar genotsid hisoblanmaydi, Rossiya qo‘shinlari esa tinchlikparvar emas
- Kiyev Putinning shartlarini qabul qilishdan bosh tortdi
- Rossiya tashqi ishlar vazirligi Ukrainadagi diplomatik vakolatxonalari xodimlarining evakuatsiyasi boshlanishini e’lon qildi
Izoh (0)