“Barselona” hujumkor yarim himoyachisi Usmon Dembele katalonlar safida qolishga tayyor. Hozircha u shunday fikrda, deya xabar qilmoqda Diario Sport.
Dembele qishki transfer oynasidagi vaziyat va rahbariyat bilan kelishmovchilik bo‘lganiga qaramasdan uni tarkibda olib qolib, o‘yin amaliyoti berayotgani uchun Xavidan minnatdor.
“Barselona” Usmon bilan yangi shartnoma borasida kelishuvga erishishiga unchalik ishonmayapti. Shu bilan birga muzokaralar uchun eshiklar doimo ochiqligi, lekin birinchi bo‘lib qadam tashlamasligini bildirdi. Barchasi futbolchining o‘ziga bog‘liq.
“Ko‘k-anorranglilar” endi Dembelega qishdagidek shartlar bilan yangi shartnoma taklif qilmaydi.
Ma’lumot uchun, Dembele yanvar oyida klub taklif qilgan shartnomani imzolamasligi va yozda erkin agent maqomida jamoani tark etish niyatida ekanini ma’lum qilgandi, kataloniyaliklar esa qishki transfer oynasida futbolchi sotilmasa, mavsumning qolgan qismini zaxira o‘rindig‘ida o‘tkazishini xabar qilgandi. Dembele tufayli “Barselona” prezidenti Xoan Laporta va Xavi o‘rtasida kelishmovchilik yuzaga keldi. Keyinchalik rahbariyat bu borada Xaviga to‘la erkinlik berdi va murabbiy 24 yoshli futbolchidan mavsum oxirigacha o‘zi istaganidek foydalanishiga ruxsat berdi.
Izoh (0)