Dragan Cheran va Oybek Bozorov 2 ta, Sherzod A’zamov esa 3 ta o‘yinga diskvalifikatsiya qilindi

O‘zbekiston futbol assotsiatsiyasi Tartib-intizom qo‘mitasi 2021-yilgi mavsum oxirida bo‘lib o‘tgan uchrashuvlarda yuz bergan holatlar bo‘yicha chiqarilgan qarorlar bo‘yicha bayonot berdi.

2021-yilning 24-noyabr kuni O‘zbekiston Kubogi yarim final doirasidagi “Paxtakor” — “Bunyodkor” uchrashuvida “Paxtakor” futbolchisi Dragan Cheran o‘yinning 21-daqiqasida to‘p uchun kurashda oyog‘ining tag qismi bilan raqib o‘yinchisining tizza qismiga zarba bergan. Hakam ushbu vaziyatda uni uchrashuvdan chetlashtirgan. Shuningdek, mazkur o‘yinda “Paxtakor”ning yana bir futbolchisi Sherzod A’zamov 120+2-daqiqada o‘yin qoidasini jiddiy tarzda buzgani, ya’ni to‘p uchun kurashda oyog‘ining tag qismi bilan raqib futbolchisi oyog‘ining kaft qismiga zarba bergani uchun maydondan chetlatilgan. Tartib-intizom qo‘mitasining qaroriga ko‘ra, Cheran 2 ta o‘yinga, A’zamov esa 3 ta o‘yinga diskvalifikatsiya qilindi va ularning har ikkisiga nisbatan jarima intizom chorasi qo‘llandi.

O‘zbekiston Kubogi yarim final doirasidagi yana bir bahs “OKMK” — “Nasaf” uchrashuvida mehmonlar futbolchisi Marko Stanoyevich o‘yinning 61-daqiqasida qoidani jiddiy ravishda buzgan. Ya’ni u to‘p uchun kurashda oyog‘ining tag qismi bilan raqib futbolchisining tizza qismiga zarba bergan va o‘yindan chetlatilgan. Tartib-intizom qo‘mitasining qaroriga ko‘ra, unga nisbatan 2 ta o‘yinga diskvalifikatsiya qilish va jarima intizom chorasi qo‘llandi.

2021-yilning 4-dekabr kuni “Paxtakor” — “Nasaf” jamoalari o‘rtasidagi O‘zbekiston Kubogi final uchrashuvining 34-daqiqasida “Nasaf” jamoasining futbolchisi Oybek Bozorov o‘yin qoidasini jiddiy tarzda buzgani, ya’ni to‘p uchun kurashda oyog‘ining tag qismi bilan raqib o‘yinchisining to‘piq qismiga kuchli zarba bergani uchun maydondan chetlatilgan. Tartib-intizom qo‘mitasining qaroriga ko‘ra, Bozorov 2 ta o‘yinga diskvalifikatsiya qilindi.

O‘zbekiston Superligasining 25-turidan o‘rin olgan “Andijon” — “Navbahor” uchrashuvining 89-daqiqasida “Andijon” safida harakat qilgan Usmonali Ismonaliyev “Navbahor” jamoasi muxlislari joylashgan sektorga qarab nojo‘ya harakatlarni amalga oshirgan. Tartib-intizom qo‘mitasining qaroriga ko‘ra, Usmonali Ismonaliyevga nisbatan jarima intizom chorasi qo‘llandi.

O‘zbekiston Superligasining 26-turidan o‘rin olgan “Nasaf” — “Lokomotiv” uchrashuvida “Nasaf” jamoasi futbolchisi Jo‘rabek Mannonov o‘yinning 65-daqiqasida qoidani jiddiy buzgan, ya’ni oyog‘ining tag qismi bilan raqib futbolchisi oyog‘ining kaft qismiga zarba bergan va o‘yindan chetlatilgan. Tartib-intizom qo‘mitasining qaroriga ko‘ra, Mannonov 2 ta o‘yinga diskvalifikatsiya qilindi va unga nisbatan jarima intizom chorasi qo‘llandi.

O‘zbekiston Superligasining 26-turidan o‘rin olgan yana bir uchrashuv “Surxon” — “Mash’al” bahsida mehmonlar vakili Najmiddin Normurodov o‘yinning 90+6-daqiqasida raqibga orqa tomondan yelkasi bilan zarba bergan. Hakam ushbu vaziyatda uni o‘yindan chetlatgan. Tartib-intizom qo‘mitasining qaroriga ko‘ra, Normurodov 1 ta o‘yinga diskvalifikatsiya qilindi.

Shuningdek, Superliganing ushbu turidan o‘rin olgan “OKMK” — “So‘g‘diyona” uchrashuvida “OKMK” futbolchisi Aleksandr Kasyan o‘yin yakunidan so‘ng hakamlikdan noroziligini qo‘pol tarzda bildirgan va unga qizil kartochka ko‘rsatilgan. Tartib-intizom qo‘mitasining qaroriga ko‘ra, Kasyan 3 ta o‘yinga diskvalifikatsiya qilindi va unga nisbatan jarima intizom chorasi qo‘llanildi.

Futzal Oliy ligasining 6-turi doirasidagi “Lokomotiv” – “Stroitel Zarafshon” uchrashuvidan so‘ng “Lokomotiv” jamoasining murabbiyi Farhod Mirahmedov Intizom Kodeksining 5.43-bandini buzgan, ya’ni Superliga va Pro-Liga klublari bosh murabbiylari uchrashuvdan keyingi matbuot anjumanida ishtirok etishi haqidagi majburiyatni bajarmagan. Tartib-intizom qo‘mitasining qaroriga ko‘ra, Mirahmedovga nisbatan jarima intizom chorasi qo‘llandi.

Futzal Oliy ligasining 7-turi doirasidagi “Nasaf” – “Metallurg” uchrashuvining 22-daqiqasida o‘yin qoidasi buzilganidan so‘ng “Metallurg” jamoasining bosh murabbiyi Ravshan Rajabov hakamga nisbatan o‘z noroziligini bildirgan. Yordamchi hakam uni tinchlantirishga uringan. Ushbu vaziyatda “Metallurg” futbolchisi Ilhom Rajabov yordamchi hakamga nisbatan tajovuzkor xatti-harakatni amalga oshirgan va qizil kartochka bilan maydondan chetlatilgan. Tartib-intizom qo‘mitasining qaroriga ko‘ra, Rajabov 2 ta o‘yinga diskvalifikatsiya qilindi.

O‘FA Tartib-intizom qo‘mitasi