DXR (Donetsk Xalq Respublikasi) va LXR (Lugansk Xalq Respublikasi) mustaqilligini tan olishi sababli UEFA Chempionlar Ligasi finalini Rossiyadan tortib olishni rejalashtirmayapti.
Tashkilot Rossiya va Ukraina o‘rtasidagi beqaror munosabatlarga qaramay, musobaqa finalini Sankt-Peterburgda o‘tkazishni rejalashtirmoqda, deya xabar beradi The Guardian nashri.
“UEFA vaziyatni muntazam kuzatib boryapti. Hozirda finalni boshqa joyga ko‘chirish haqida hech qanday reja yo‘q”, — deyiladi tashkilot bayonotida.
Keyinchalik vaziyatga siyosatchilar ham aralashdi. Buyuk Britaniya bosh vaziri Boris Jonson UEFAga finalni ko‘chirish masalasini o‘ylab ko‘rishni maslahat berdi: “Rossiya tobora yakkalanib bormoqda. U quvg‘in maqomini oldi... Mustaqil davlatlarni bosib olishga harakat qilayotgan Rossiyaning futbol musobaqalarini o‘tkazishga hech qanday haqqi yo‘q”.
Uning pozitsiyasini Buyuk Britaniya sport, OAV va madaniyat vaziri Nadin Dorris ham qo‘llab-quvvatladi. “Rossiyada o‘tkaziladigan Chempionlar Ligasi finali kabi sport tadbirlaridan jiddiy xavotirdaman va buni tegishli boshqaruv organlari bilan muhokama qilaman”, — deb yozib qoldirdi Dorris o‘z Twitter sahifasida.
London meri Sodiq Xon esa YChL finalini Angliya poytaxtida o‘tkazishga tayyor ekanini bildirdi: “London Chempionlar Ligasi finalini qabul qilishga tayyor. Agar UEFA finalni Peterburgda o‘tkazsa, bu bilan Putin Rossiyasining tajovuzkor harakatlarini mukofotlagan bo‘ladi”.
Chempionlar Ligasi 2021/22-yilgi mavsumi finali 28-may kuni Sankt-Peterburgdagi “Gazprom Arena” stadionida bo‘lib o‘tadi.
Ma’lumot uchun Rossiya prezidenti Vladimir Putin 21-fevral kuni DXR va LXR mustaqilligini tan olish to‘g‘risidagi farmonlarni imzoladi. Shu sabab bir qator nashrlar nufuzli musobaqa finali boshqa mamlakatda o‘tkazilish ehtimoli borligini yozib chiqdi.
Izoh (0)