Paulo Dibalaning qaysi klubga o‘tmoqchi ekanligi ma’lum bo‘ldi

“Yuventus” hujumchisi Paulo Dibala “Barselona”ga o‘tishi mumkin. Bu haqda Diario Sport nashri xabar bermoqda.

Manbaga ko‘ra, argentinalik futbolchining o‘zi katalon klubiga o‘tishga qiziqib qolgan. “Barselona” rahbariyati futbolchining vakillari bilan muloqotga kirishishga ham ulgurgan. Turin klubi yangi shartnoma bo‘yicha Dibalaga kamroq maosh taklif qilganidan so‘ng futbolchi Ispaniyaga ko‘chib o‘tish variantini jiddiy ko‘rib chiqa boshlagan.

Shuningdek, “Yuventus” bilan kelisha olmayotgan 28 futbolchiga “Inter” va “Tottenhem”dan ham qiziqish mavjud. Avvalroq, “Liverpul” va “Manchester Siti”ning Pauloni tekinga qo‘lga kiritmoqchi ekanligi to‘g‘risida xabarlar yangragandi.

Ma’lumot uchun, Dibala 2015-yilning yozida “Palermo”dan 41 million yevro evaziga turinliklar safiga o‘tgan. Uning klub bilan amaldagi shartnomasi yozda o‘z nihoyasiga yetadi.

2021/22-yigi mavsumda hujumchi Italiya A Seriyasining 20 ta o‘yinida 7 ta gol urdi va 5 ta golga assistentlik qildi. Bundan tashqari, Chempionlar Ligasida ham o‘z nomiga 3 ta gol va bitta golli uzatma yozdirib qo‘ygan.

Transfermarkt portali argentinalik hujumchining transfer narxini 50 million yevroga baholagan.