Qirg‘iziston prezidenti Donetsk va Lugansk xalq respublikalarining tan olinishiga munosabat bildirdi

U yoki bu davlatni tan olish har qanday davlatning suveren huquqidir, dedi Qirg‘iziston prezidenti Sadir Japarov Rossiya tomonidan Donetsk va Lugansk xalq respublikalarining tan olinishiga izoh berar ekan.

Japarovning so‘zlariga ko‘ra, u Ukraina sharqidagi vaziyat rivojini “tashvish va chuqur xavotir” bilan kuzatmoqda.

“Menga Donbass atrofidagi vaziyatning qanday rivojlanayotgani haqida doimiy ravishda xabar berib turiladi. Qirg‘iziston har doim Minsk kelishuvlariga rioya qilish zaruratidan kelib chiqqan. Ushbu kelishuv qarama-qarshiliklarni hal qilish bo‘yicha Birlashgan Millatlar Tashkilotining Xavfsizlik Kengashi tomonidan qo‘llab-quvvatlangan yagona hujjatdir. Afsuski, unga rioya qilmaslik hozirgi qiyin vaziyatga olib keldi”, — deb yozgan Japarov Facebook’da.

U insonlarning qurbon bo‘lishiga yo‘l qo‘ymaslik uchun vaziyatni faqat tinch diplomatik yo‘llar bilan, muzokaralar stolida hal qilish zarurligiga ishonch bildirdi.

“Inson hayoti Yer yuzidagi eng qimmatli narsa. Men sizni mojaroning yanada avj olishiga yo‘l qo‘ymaslik uchun vaziyatni hal qilishda maksimal darajada ehtiyotkorlik va vazminlik ko‘rsatishga chaqiraman. Balki bu (tan olish) ko‘plab Rossiya fuqarolari yashaydigan Donbassning tinch aholisini himoya qilish uchun majburiy chora bo‘lgandir. Qayd etishni istardimki, u yoki bu davlatni tan olish har qanday davlatning suveren huquqidir”, — dedi Japarov.

Rossiya prezidenti Vladimir Putin 21-fevral kuni Xavfsizlik kengashi yig‘ilishida DXR va LXR mustaqilligini e’lon qilish taklif etilganidan keyin, mamlakat fuqarolariga murojaat yo‘lladi va respublikalarning mustaqilligini tan olish haqidagi farmonni imzoladi. 22-fevralda Donbassdagi respublikalarning parlamentlari, Rossiya davlat dumasi va federatsiya kengashi ushbu hujjatlarni ratifikatsiya qildi.

Aksariyat xorijiy yetakchilar Putinning qaroriga salbiy munosabat bildirdi. Qozog‘iston tashqi ishlar vaziri Muxtor Tlovberdi respublikalarni tan olish ehtimolini rad etdi. “Sizni ishontirib aytishim kerakki, Qozog‘iston tomonidan Lugansk va Donetsk xalq respublikalarini tan olish haqida gap yo‘q. Biz xalqaro huquq asoslaridan va BMT nizomining asosiy tamoyillaridan kelib chiqamiz”, — dedi u jurnalistlar bilan suhbatda.

Shu bilan birga, Suriya, o‘zlari qisman tan olingan davlatlar bo‘lgan Janubiy Osetiya va Abxaziya Rossiyaning LXR va DXR bo‘yicha qarorini qo‘llab-quvvatlashini bildirdi.