Yevropa ittifoqi mamlakatlari Rossiyaning Lugansk hamda Donetsk Xalq Respublikalarining mustaqilligini tan olganiga javoban mamlakatga nisbatan yangi sanksiyalar paketini ma’qullashga qaror qildi. Bu haqda Yevroittifoq diplomatiyasi rahbari Jozep Borrelga tayanib, “Interfaks” xabar bergan.
“Rossiyaga jiddiy zarba beradigan yangi sanksiyalar YI mamlakatlarining vakillari tomonidan bir ovozdan ma’qullangan”, – deya qayd etgan Borrel Parijda bo‘lib o‘tgan Yevroittifoq xorij masalalari bo‘yicha kengashining norasmiy konferensiyasida.
Uning so‘zlariga ko‘ra, sanksiyalar ro‘yxatiga 27 jismoniy va yuridik shaxs, jumladan, Rossiyaning Donbassdagi operatsiyalarini moliyalashtiradigan banklar va tashkilotlar, shuningdek DXR va LXR mustaqilligi uchun ovoz bergan Rossiya dumasining 351 nafar deputati o‘rin olgan.
Avval Yevropa ittifoqi sanksiyalari Rossiya parlamentariylari va banklariga nisbatan tatbiq qilinishi mumkinligi haqida xabarlar tarqalgandi. Ammo xabarlarda qaysi kompaniyalar va parlament a’zolariga nisbatan taqiqlar joriy qilinishiga aniqlik kiritilmagan.
Yevroittifoq Rossiya hamda Ukraina atrofidagi keskin vaziyatni diplomatik yo‘l bilan, BMT va YeXHT bilan birgalikda hal etish tarafdori.
“Nima qilib bo‘lsa ham ushbu nizoni bartaraf etishimiz zarur. Rossiyani muzokaralarga qaytarish uchun ishlashda davom etamiz”, — deya ta’kidlagan Borrel.
Yevropa ittifoq rasmiylari Rossiyaning kelgusidagi harakatlarini diqqat bilan kuzatib borilishi va mamlakatga yana qo‘shimcha taqiqlar qo‘llanilishi mumkinligini inkor etmagan.
Izoh (0)