Германияда Россия президенти Владимир Путиннинг сиёсатига қарши ўтказилган норозилик намойишларига 600 дан ортиқ одам чиқди. Улар Россия элчихонаси ёнида тўпланган, деб хабар беради «Укринформ».
Акция иштирокчилари орасида Германия Социал-демократлар партияси етакчиларидан бири Заския Эскен ва маданият ишлари бўйича берлинлик сенатор Калус Ледерар ҳам бўлган.
«Путин, Донбассдан нари кет!», «Путин, тўхта!», «Урушни тўхтат!» ёзувлари туширилган плакатларини кўтариб олган фаоллар Украина суверенитети ва ҳудудий яхлитлигининг бузилишига қарши норозилик билдирган.
Улар Россия қўшинларини Украинанинг эгаллаб олинган ҳудудларидан олиб чиқиб кетишни, Украинага мудофаа қуролланишини тақдим этишни, Путин ҳамда унинг олигарх-дўстларига қарши санкциялар қўллаш, шунингдек, «Шимолий оқим-2» газ қувурини бутунлай тўхтатишни талаб қилмоқда.
Германия канцлери Олаф Шольцнинг маълум қилишича, мамлакат ҳукумати «Шимолий оқим-2» газ қувурининг сертификатини тўхтатади. Канцлер Германия Иқтисодиёт вазирлигига бу борадаги тегишли кўрсатмани берган.
Шу билан бирга, канцлер Россиянинг ДХР ва ЛХРни тан олишига муносабат мақсадли ва мустаҳкам бўлишини, Москванинг ҳаракатлари эса оқибатсиз қолмаслигини таъкидлаган. Шунингдек, Олаф Шольц Германия «Норманд формати»ни муҳим деб ҳисоблашини ва уни Франция билан биргаликда қўллашда давом этишини маълум қилган.
Россия президенти Владимир Путин 21 февраль куни Хавфсизлик кенгаши йиғилишида ДХР ва ЛХР мустақиллигини эълон қилиш таклиф этилганидан кейин, мамлакат фуқароларига мурожаат йўллади ва республикаларнинг мустақиллигини тан олиш ҳақидаги фармонни имзолади. 22 февраль куни Россия давлат думаси ва федерация кенгаши ушбу фармонни ратификация қилди.
Шундан сўнг, Байден ДХР ва ЛХР мустақиллигини тан олган Россияга қарши санкциялар эълон қилди. Шунингдек, Япония, Канада ва Австралия ДХР ва ЛХРнинг тан олиниши сабаб Россияга қарши қатор санкцияларни жорий этди.
Изоҳ (0)