AQShning Moskvadagi elchixonasi amerikalik fuqarolarni Rossiyadagi jamoat joylarida teraktlar sodir etilishi xavfidan ogohlantirdi.
“OAV ma’lumotlariga ko‘ra, yirik shaharlar, jumladan, Moskva va Sankt-Peterburgdagi savdo markazlari, temiryo‘l va metro bekatlari, boshqa gavjum joylarga, shuningdek, Rossiyaning Ukraina bilan chegarasidagi keskinlik yuqori bo‘lgan hududlarga hujum uyushtirilish xavfi bo‘lgan”, — deyiladi elchixona saytida.
Elchixona teraktlar xavfi haqida ma’lumot taqdim etgan OAVlarga havola bermagan.
Bunday tahdidlar haqida e’lon qilingandan so‘ng, AQSh diplomatlari Rossiyadagi vatandoshlariga OAVlarni kuzatib borishni, olomondan uzoq bo‘lishni, do‘stlar va oila a’zolar bilan aloqani saqlashni hamda “AQSh hukumatining yordamisiz ham” Rossiyadan evakuatsiya rejasini tuzishni maslahat bermoqda.
Rossiya Tashqi ishlar vazirligining rasmiy vakili Mariya Zaxarova o‘zining Telegram-kanalida Amerika elchixonasi xabariga munosabat bildirdi. “AQShning Moskvadagi elchixonasiga savol: Tegishli ma’lumotlarni hamkor kanallar orqali rossiyalik hamkasblaringizga uzatdingizmi? Agar unday bo‘lmasa, buni qanday tushunish kerak?” — deb yozgan u.
Yanvar oyi boshida AQSh elchixonasi amerikaliklarga Ukraina bilan chegarada davom etayotgan keskinlik tufayli Rossiyaga bormaslikni tavsiya qilgandi. Ogohlantirishda Shimoliy Kavkazda teraktlar xavfi haqida ham so‘z borgan. Ukraina atrofidagi vaziyatning keskinlashuvi fonida AQSh Davlat departamenti ham amerikaliklarga Ukraina va Belarusga sayohatdan tiyilishni tavsiya qilgan.
Izoh (0)