Ukraina Rossiya hujumi haqidagi xabarlar sabab oyiga 3 mlrd dollargacha zarar ko‘rayotganini ma’lum qildi

Ukrainaga nisbatan hujum uyushtirilishi haqida ma’lumotlar tarqatilishi oqibatida mamlakat oyiga 2-3 milliard dollar yo‘qotadi. Bu haqda prezident ofisi rahbarining o‘rinbosari Rostislav Shurma “RBK-Ukraina” nashriga bergan intervyusida ma’lum qildi.

Shu bilan birga, amaldorning ta’kidlashicha, Ukraina budjeti to‘liq xalqaro moliyaviy tashkilotlar bilan hamkorlik hisobiga “yopilmoqda”.

“Biz hozirgidek stressli vaziyatda qaytarib bo‘lmas yo‘qotishlar oyiga 2-3 milliard dollarni tashkil etishini ko‘ryapmiz. Bu — to‘xtatib qo‘yilgan investitsiyalar hamda qo‘shimcha inflyatsiya, turistik sohadagi yo‘qotishlar, aviatashuvlarning qisqarishi. Shuningdek, moliya bozorlarida spekulyativ bosim mavjud bo‘lib, u qarz olishni bloklaydi, valyuta kursiga bosim o‘tkazadi, bu taxminan 1,5-2 milliard dollarni tashkil etadi”, — deydi Shurma.

Uning so‘zlariga ko‘ra, “stress darajasi” shunday qoladigan bo‘lsa, Ukrainaning oylik yo‘qotishlari ortib borishi mumkin. Biroq uning taxminicha, vaziyat barqarorlashsa, bir necha oydan so‘ng yo‘qotishlar umuman bo‘lmaydi.

G‘arb OAV va siyosatchilar 2021-yil oktabr oyi oxiridan beri Rossiyaning Ukrainaga hujum uyushtirishga tayyorlanayotganini taxmin qilib, Moskvani Kiyevga nisbatan tajovuzkor siyosat yuritishda ayblab kelmoqda. 14-fevral kuni Rossiya mudofaa vazirligi mamlakat armiyasining Ukraina bilan chegara hududidagi keng miqyosli mashg‘ulotlari yakuniga yetishini e’lon qildi, ertasi kuni esa Janubiy hamda G‘arbiy harbiy okruglar o‘quv mashg‘ulotlardan ortga qaytayotganini bildirdi. Zelenskiy Rossiya harbiylarining Ukraina chegara hududidan chiqib ketayotganini sezmayotganini qayd etdi.

Yanvar oyida CNN Ukraina va AQSh prezidentlari o‘rtasida Rossiya tahdidi borasidagi qarashlarda kelishmovchilik borligini ma’lum qilgandi. Telekanal manbalarining ma’lumotlariga ko‘ra, “AQShning haddan ortiq e’tibori” Zelenskiyning joniga teggan, Jo Baydenga esa uning ukrainalik hamkasbi muammoning jiddiyligini kamaytirishga urinayotgani yoqmagan.

Rossiya hukumati bir necha bor Moskva hujumni rejalashtirmayotganini ma’lum qildi. Rossiya tashqi ishlar vaziri Sergey Lavrov G‘arbning hujumga tayyorgarlik borasidagi versiyasini “propaganda, feyk va uydirma” deb atagan. Prezident Vladimir Putin ham Rossiya Yevropa bilan yangi urushni xohlamasligini ta’kidlagan.

Yanvar oxirlariga Zelenskiy Rossiyaning Ukrainaga hujum borasida xabarlarning tarqatilishi oqibatida mamlakat iqtisodiyotidan 12,5 milliard dollar olib chiqib ketilganini bildirgandi.