Россия президенти Владимир Путин раҳбарлигида мамлакат Хавфсизлик кенгашининг навбатдан ташқари йиғилишида Донецк ҳамда Луганск Халқ Республикалари мустақиллигини тан олиш масалалари муҳокама қилинди. Бу ҳақда Meduza хабар берган.
Хавфсизлик кенгаши йиғилишининг бошида Россия ТИВ раҳбари Сергей Лавров НАТОнинг шарқда қўшинларини кенгайтирмаслигининг кафолатлари бўйича дипломатик ишлар ҳақида, Россия президенти администрацияси раҳбарининг ўринбосари Дмитрий Козак эса Минск келишуви шартларига риоя қилиш хусусида ҳисобот берди.
Хусусан, Козак Донбасснинг Украинага ҳам Ғарбга ҳам керакмаслиги, Украина ҳукумати Донбассни мамлакат таркибига қайтариб олмоқчи эмаслигини таъкидлади.
Россия федерал хавфсизлик хизмати раҳбари Александр Бортников Россия ҳамда Украина чегарасидаги қўпорувчи гуруҳлар, шунингдек Украина ҳарбийлари асирга олинган одамлар, Донбассдан Россияга келган 68,5 минг қочоқ тўғрисида маълумот берди.
Россия мудофаа вазири Сергей Шойгу Донбассда бир кечанинг ўзида 40 дан зиёд отишма содир бўлгани, Донецкда сув таъминотидан узилиб қолган аҳоли ва инфратузилма объектларига етган талафотлар ҳақида гапирди.
Шойгунинг сўзларига кўра Донбассда 59,3 минг украиналик ҳарбийлар, 345 та танк, 2160 та ҳарбий зирҳли машина, «Смерч» ракета ўрнатмалари, «Точка-У» ракета комплекслари ва бошқа техникалар мавжуд. Шунингдек, Россия мудофаа вазири Украинанинг ўзига ядро мамлакати мақомини қайтариб олишга тайёрлигини таъкидлади.
Амалдорларнинг ҳисоботлари ва нутқларидан кейин Путин Донецк ҳамда Луганск Халқ Республикаларининг мустақиллигини тан олиш масаласини ҳал этиш кераклигини билдирди ва сўз навбатини Хавфсизлик кенгаши раисининг ўринбосари Дмитрий Медведевга берди.
Медведев Луганск ва Донецк вилоятлари аҳолиси Украинадан анча вақтдан бери ҳеч қандай ижтимоий ёрдам олмагани, аксинча уларга нисбатан зўравонлик ҳолатлари кўпайиб бораётганини қайд этди. Медведев 2008 йилда президент лавозимида ишлаган пайтида Жанубий Осетия ва Абхазия мустақиллигининг тан олинганини эслади. Медведев йиғилиш иштирокчиларига ўтмишдаги тажриба ЛХР ва ДХР мустақиллигини тан олиш билан боғлиқ вазиятнинг доимий равишда совуқлашиб боришини тахмин қилди.
Кейин Давлат думаси спикери Вячеслав Володин ва Федерация кенгаши спикери Валентина Матвиенко нутқ сўзлади, улар Путиндан ЛХР ҳамда ДХР мустақиллигини тан олишни сўради. Сўнгра Хавфсизлик кенгаши котиби Николай Патрушев ЛХР ва ДХР мустақиллигини тан олиш — масалани ҳал этишнинг ягона йўли эканлиги, бош вазир Михаил Мишустин эса Россия бир неча ойдан бери санкцияларга тайёрланаётганини қайд этди. Россия ташқи разведка раҳбари Сергей Наришкин Ғарбнинг Киевни Донбасс муаммосини куч ишлатиб ҳал этишга чорлаётгани, Россия бунга йўл қўймаслиги зарурлигини билдирди. Путин Наришкиндан ЛХР ва ДХР мустақиллигини тан олиш ҳақида тўғридан-тўғри жавоб беришни талаб қилди.
Россия ички ишлар вазири Владимир Колоколцев республикаларни Украина ҳукумати бостириб кирган чегаралар қисмида мустақил деб эълон қилишни таклиф этди.
Шунингдек, Россия президентининг Марказий федерал округдаги ишончли вакили Игорь Шеголев ҳам йиғилишда ўз фикр-мулоҳазаларини билдириб ўтди.
Йиғилиш якунида Путин ҳамкасбларининг таклифини диққат билан тинглагани ва бугуннинг ўзида бу борада якуний қарор қабул қилинишини ваъда қилди.
Аввал хавфсизлик кенгаши йиғилишда олдин ДХР ва ЛХР раҳбарлари Путинга ушбу республикалар мустақиллигини тан олиш, сўнгра дўстлик ҳамда ҳамкорлик тўғрисида келишув имзолашни сўраб мурожаат йўллагани ҳақида хабар берилганди.
15 февралда Россия давлат думаси депутатлари ДХР ва ЛХР мустақиллигини тан олиш ҳақида мамлакат президентига мурожаат тўғрисидаги қарорни қабул қилган. Ҳужжат Россия Федерацияси коммунистик партияси томонидан тайёрланган. Овоз бериш жараёнлари якунига кўра Давлат думаси спикери Вячеслав Володин мурожаатнинг дарҳол имзоланиши ва Владимир Путинга йўналтирилишини билдирган.
Изоҳ (0)