Ijtimoiy tarmoqlarda “Namanganda maskali akalar va YPX xodimlari xalqni qo‘rqitib, fuqarolarga nisbatan elektroshokerlarni ishlatmoqda” sarlavhali videolavha tarqaldi. Viloyat Ichki ishlar boshqarmasi holatga munosabat bildirdi.
Qayd etilishicha, 16-fevral kuni soat 20:38 larda Namangan shahar Islom Karimov ko‘chasida YPX inspektorlari tomonidan yo‘l transport hodisalarini barvaqt oldini olish harakat xavfsizligini ta’minlash yuzasidan xizmat olib borilgan. Shu vaqtda “Vaz-21011” avtomashina to‘xtatib tekshirilgan. Tekshiruv natijasida haydovchi transport vositasiga tegishli ruxsatnomasiz qo‘shimcha gaz balon (odatda bitta gaz balonga ruxsat beriladi) o‘rnatib olgani aniqlangan. Shu sababli ma’muriy bayonnoma rasmiylashtirilib, mashina vaqtinchalik jarima maydoniga joylashtirilgan.
Haydovchi ushbu holatda huquqbuzarligiga to‘liq iqrorligini bildirgan. Ammo avtomashinada yo‘lovchi sifatida ketayotgan fuqaro vaziyatga provakatsion tus berib, turli xil bahonalar bilan avtomashinani jarima maydonidan chiqarib berishini aytib, inspektorni tasvirga olgan. U videoni ijtimoiy tarmoqlarga chiqarib, inspektorlarga nisbatan jamoatchilik orasida salbiy fikr uyg‘otishga uringan.
Tadbir jarayonida hech bir haydovchiga nisbatan elektroshoker ishlatilmagan.
Eslatib o‘tamiz, O‘zbekistonda 24-sentabrdan boshlab ichki ishlar organlari xodimlari tomonidan elektroshokerdan foydalanish boshlangandi. Avvaliga Farg‘ona, so‘ng Surxondaryo, Toshkent shahar xodimlariga elektroshok qurilmalari topshirildi.
Ma’lumotga ko‘ra, ichki ishlar organi xodimining qonuniy talablarini bajarmaslik, hokimiyat vakiliga yoki fuqaroviy burchini bajarayotgan shaxsga qarshilik ko‘rsatish oqibatida IIO xodimlari yoki fuqarolarning hayoti va sog‘lig‘iga real xavf tug‘dirgan taqdirda ushbu qurilma xodimlar tomonidan foydalaniladi.
Mavzuga doir:
Izoh (0)