Ижтимоий тармоқларда «Наманганда маскали акалар ва ЙПХ ходимлари халқни қўрқитиб, фуқароларга нисбатан электрошокерларни ишлатмоқда» сарлавҳали видеолавҳа тарқалди. Вилоят Ички ишлар бошқармаси ҳолатга муносабат билдирди.
Қайд этилишича, 16 февраль куни соат 20:38 ларда Наманган шаҳар Ислом Каримов кўчасида ЙПХ инспекторлари томонидан йўл транспорт ҳодисаларини барвақт олдини олиш ҳаракат хавфсизлигини таъминлаш юзасидан хизмат олиб борилган. Шу вақтда «Ваз-21011» автомашина тўхтатиб текширилган. Текширув натижасида ҳайдовчи транспорт воситасига тегишли рухсатномасиз қўшимча газ балон (одатда битта газ балонга рухсат берилади) ўрнатиб олгани аниқланган. Шу сабабли маъмурий баённома расмийлаштирилиб, машина вақтинчалик жарима майдонига жойлаштирилган.
Ҳайдовчи ушбу ҳолатда ҳуқуқбузарлигига тўлиқ иқрорлигини билдирган. Аммо автомашинада йўловчи сифатида кетаётган фуқаро вазиятга провакацион тус бериб, турли хил баҳоналар билан автомашинани жарима майдонидан чиқариб беришини айтиб, инспекторни тасвирга олган. У видеони ижтимоий тармоқларга чиқариб, инспекторларга нисбатан жамоатчилик орасида салбий фикр уйғотишга уринган.
Тадбир жараёнида ҳеч бир ҳайдовчига нисбатан электрошокер ишлатилмаган.
Эслатиб ўтамиз, Ўзбекистонда 24 сентябрдан бошлаб ички ишлар органлари ходимлари томонидан электрошокердан фойдаланиш бошланганди. Аввалига Фарғона, сўнг Сурхондарё, Тошкент шаҳар ходимларига электрошок қурилмалари топширилди.
Маълумотга кўра, ички ишлар органи ходимининг қонуний талабларини бажармаслик, ҳокимият вакилига ёки фуқаровий бурчини бажараётган шахсга қаршилик кўрсатиш оқибатида ИИО ходимлари ёки фуқароларнинг ҳаёти ва соғлиғига реал хавф туғдирган тақдирда ушбу қурилма ходимлар томонидан фойдаланилади.
Изоҳ (0)