Ijtimoiy tarmoqlarda Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov Toshkent shahar hokimi vazifasini bajarishga tayyorlanayotgani to‘g‘risida xabarlar tarqaldi. Keyinroq bu boradagi mish-mishlar rad etildi. Telegram’dagi “Times.uz” kanali mazkur xabar qanday tarqatilganiga oid voqea xronologiyasi haqida yozdi.
Nashrning ma’lum qilishicha, bir guruh uddaburonlar 2021-yil dekabr oyidan beri yuritilmayotgan “Bir Joyda | Maxfiy yangiliklar” kanalining klonini (feykini) ochadi va kanalni “privatniy” (yopiq) shaklga o‘tkazadi. Mazkur kanalga Komil Allamjonovning “hokim bo‘lishi haqidagi” uydirma post joylangan.
O‘yin 2022-yil 18-fevral kuni soat 00:04 da boshlanadi va birinchi material Telegram messenjerining “Tanishuv chat 2021” nomli ko‘ngilochar guruhida guruh ma’muri tomonidan “repost” qilish orqali joylashtiriladi (guruh ma’muri bu postni shu kunning o‘zida soat 12:56 da yana bir marta joylashtiradi.Qayd etib o‘tish joizki, Umid Shermuhammedov “Times.uz” kanalida ta’kidlanganidek “Kun.uz” nashrining asoschisi emas, balki keyinchalik ushbu saytni sotib olgan investor hisoblanadi.Shundan so‘ng ushbu postlar shu kunning o‘zida soat 00:15 dan boshlab 13:49 gacha turli anonim guruh va kanallarda tarqatiladi.
Keyingi yurish — 18-fevral kuni soat 13:10 da Toshkent shahar hokimiga tegishli bo‘lgan “Xabardor.uz” saytining Telegram kanalida ushbu asossiz xabar va so‘rovnoma joylashtiriladi.
Soat 14:33 da Milliy mass-mediani qo‘llab-quvvatlash va rivojlantirish jamoat fondi matbuot kotibi Hikmatilla Ubaydullayev Komil Allamjonov Toshkent shahar hokimi vazifasini bajarishga tayyorlanayotgani to‘g‘risidagi xabarlar asossiz ekanini bildirib, raddiya beradi hamda bu raddiya ommaviy axborot vositalarida chop etiladi.
Soat 17:59 da Komil Allamjonovning o‘zi ham mish-mishlarga raddiya berdi. “Bunday fitnalar faqat ahmoqlardan chiqadi. Va ularning maqsadi toza emasligi aniq”, deb yozdi u.
Soat 18:40 da “Tentakminds” Telegram kanalida Komil Allamjonovning Toshkent shahariga hokim bo‘lishi haqidagi xabarlar xabardor.uz sayti orqali tarqatilgani va bu sayt Komil Allamjonovga tegishli ekani hamda norasmiy tarzda “Kun.uz” sayti ham Komil Allamjonovga o‘tgani haqida asossiz xabarlar e’lon qilinadi.
Soat 22:00 lar atrofida “Kun.uz” nashri asoschilaridan biri Umid Shermuhamedov o‘zining Facebook sahifasida 2019-yil bahorida “Xabardor.uz” sayti Toshkent shahar hokimi Jahongir Ortiqxo‘jayevga tegishli bo‘lgan guruhga sotilgani va bu sayt hamon shahar hokimiga tegishli bo‘lgan guruh tomonidan ishlatilishini ma’lum qiladi.
Shu kuni yana ma’lum bo‘ldiki, “Xabardor.uz” saytiga muassislik qiluvchi firma — High Networks MChJning yuridik manzili Toshkent shahri, Olmazor tumani, Beruniy ko‘chasi, 83-uyda joylashgan. “Artelchilar” “Tinchlik ofis” deb ataydigan bu joyning bir qismi Mediapark, yana bir qismi Artel kompaniyalarining ofislari hisoblanadi.
Times.uz
Ma’lumot uchun, “Times.uz” Telegram-kanali pandemiya boshida “Koronavirus info” nomi ostida ochilgan edi. Keyinchalik ushbu kanal nomini “Times.uz”ga o‘zgartirib faoliyatini davom ettirdi. “Koronavirus info” kanalini Sog‘liqni saqlash vazirligi, AOKA, O‘zbekiston yoshlar ittifoqi va Milliy mass-mediani qo‘llab-quvvatlash va rivojlantirish jamoat fondi hamkorlikda yuritgan edi.
Avvalroq Jahongir Ortiqxo‘jayev 3,5 yildan buyon hokimiyatda ishlab, davlatning bir so‘miga ham xiyonat qilmaganini bildirgandi. Keyinroq hokimning qizi otasining faoliyatini salbiy baholayotgan OAV xodimlarini tanqid qildi. Komil Allamjonov esa jurnalist va blogerlarni dushman deb bilib, ularni yomon ko‘rgan amaldorning kosasi hech qachon oqarmasligini, “ularga urush e’lon qilinsa, toki o‘sha amaldor joyidan ketmagunicha hech qachon tugamasligini” yozgan.
Izoh (0)