“3,5 yil hokim bo‘lib, davlatning bir so‘miga ham xiyonat qilmadim” — Jahongir Ortiqxo‘jayev

Jahongir Ortiqxo‘jayev Toshkent shahar hokimi sifatida 3,5 yillik faoliyati davomida bir so‘m ham davlatga xiyonat qilmagani va avval ishlagan kompaniyalari unga yordam berib turishini ma’lum qildi. Bu haqda hokim “Gazeta.uz” nashrida Toshkent shahrining Alisher Navoiy ko‘chasida olib borilayotgan rekonstruksiya ishlari yuzasidan chop etilgan “Navoiy ko‘chasini ham shossega aylantirishga qaror qilindi” nomli maqolada ko‘tarilgan masalalarga bag‘ishlangan matbuot anjumanida aytib o‘tdi, deya xabar bermoqda “Daryo” muxbiri.

Qayd etish joiz, Jahongir Ortiqxo‘jayev bir yarim soatdan ortiq davom etgan matbuot anjumanining so‘nggi 15 daqiqasida ishtirok etdi.

Avval katta kompaniyalar rahbari bo‘lganman, yoshligimdan siyosatchi bo‘lmaganman. Mening tarixim ishlab chiqarish, tadbirkorlikka bog‘liq. Umrim bo‘yi siyosatda ishlamaganman. Homiylik masalasiga kelsak, men ham shu mamlakatning farzandiman. Bozorimiz ham, mozorimiz ham — Toshkent. 3,5 yillik faoliyatim davomida ko‘p joylarga avvalgi ishlagan kompaniyam yordam berdi, homiylik qilib keldi. Riyo degan narsa bor, savob degan narsa bor. Agar bugungi homiylikni aytmasang savobini narigi dunyoda olasan, agar aytsang riyo bo‘ladi. Agar qilgan ishlarni ochiq-oydin hammaga aytsang riyo bo‘ladi. Shuning uchun bugungacha aytmadik. Lekin bugun ko‘pchilik surishtirdi, mayli.

Jahongir Ortiqxo‘jayev, Toshkent shahar hokimi

U o‘zi ishlagan kompaniya — Akfa ko‘p narsalardan voz kechayotganini aytib o‘tdi.

Akfa o‘zida faqat ishlab chiqarishni olib qoladi, qolgan — do‘kon, supermarket, gipermarketlarini sotib yuboradi. Bu yil ham Ecobozor’ni sotdi va tushgan pulning yarmi bilan o‘zining bankdagi qarzlarini to‘lamoqchi. Bundan tashqari, Akfa medline kompaniyasi 200 nafar yurak nuqsoni bilan tug‘ilgan bolalarni operatsiya qilmoqchi, o‘tgan yili 75 nafari operatsiya qilgan edi. Aytmoqchi emasdim, lekin majbur bo‘ldim. Bundan tashqari, ko‘p qilgan ishlari bor. Bu yil ham Akfa va Artel kompaniyasi yordam berish maqsadida “nima yordam qilaylik?”, deb so‘radi. Ular o‘z mol-mulklarini sotyapti, yarimini bankdagi kreditlaridan qutulishga beryapti, yarimini esa shahardagi parklar, alleyalarga sarflab, menga yordam beryapti. Yosh bolalar operatsiyasi, nochor uylarning tomlarini yopib berish, kichik mahallalarni asfaltlash kabi narsalarga xarajat qilinmoqda. Agar ochiqchasi kerak bo‘lsa shu.

Jahongir Ortiqxo‘jayev, Toshkent shahar hokimi

Uning ta’kidlashicha, 2022-yil dastlabki olti oyi hisobidan hokimlikka 80 milliard so‘m yordam puli ko‘rsatiladi.

Men shunga asoslanib, ularga o‘z iltimoslarimni aytyapman. Boshqa narsa deyolmayman. Men charchadim. 3,5 yil ishlagan bo‘lsam davlatning bir so‘m puliga xiyonat qilmadim. Oldimdan qo‘shgan bo‘lsam qo‘shdim, lekin bir so‘miga xiyonat qilmadim. Shahar hokimi bo‘lishimdan avval 35 ta mashinam bor edi. Judayam mashinalarni yaxshi ko‘raman. Hozir esa oltita qoldi. Yaqinda yana bitta mashinamni auksionga qo‘yaman, uning puliga esa yuragida nuqsoni bor bolalarni operatsiya qildiramiz. Agar bular gunoh bo‘lsa roziman, agar bu pulni ishlatma shunga desangiz ham roziman. Lekin mening aybim — qilgan ishlarni aytib turishi kerak ekan inson. Aytmaganim — gunoh. Sergelidan uyi yo‘q insonlarga 400 ta kvartira hadya qilishgan. Shularni aytsam bo‘larkan, aytmaganman. Bugun afsuslanyapman. Lekin ishonaveringlar, biror so‘m davlatga xiyonat qilmadim. Borim shu.

Jahongir Ortiqxo‘jayev, Toshkent shahar hokimi

Ma’lumot uchun, 14-fevral, dushanba kuni Alisher Navoiy ko‘chasida tramvay yo‘llarini yotqizish ishlari boshlangani to‘g‘risida xabarlar tarqaldi. Poytaxt hokimligi esa bu boradagi xabarlarni rad etib, Alisher Navoiy ko‘chasidagi ta’mirlash ishlari rejaga muvofiq boshlanganini qayd etdi. “Gazeta.uz” nashri esa 15-fevral kuni mazkur ta’mirlash ishlari poytaxtliklarni ogohlantirmasdan boshlanganini qayd etib, prezident Shavkat Mirziyoyevga murojaat tarzida “Navoiy ko‘chasini ham shossega aylantirishga qaror qilindi” maqolasini e’lon qildi.