Toshkentning Chilonzor tumanida joylashgan Gagarin haykali va uning atrofidagi hududlar ta’mirlanadi. Bu haqda tuman hokimligi matbuot xizmati xabar berdi.
Ma’lum qilinishicha, tumandagi “1-Katta Chilonzor” va “2-Katta Chilonzor” mahallalari o‘rtasida joylashgan sayilgoh anchadan beri qarovsiz ahvolda bo‘lgani uchun uni ta’mirlash bo‘yicha aholidan ko‘plab murojaatlar kelib tushgan. Mazkur murojaatlar yechimi sifatida hozirda bu yerda qurilish va ta’mirlash ishlari boshlab yuborilgan. Qayd etilishicha, tumanning “3-Katta Chilonzor” mahallasi hududida joylashgan, 1962-yilda qurilgan Gagarin haykali atrofini ham ta’mirlash rejalashtirilgan.
13-fevral kuni Chilonzor tumani hokimining Arxitektura, qurilish va kommunikatsiyalarni rivojlantirish bo‘yicha o‘rinbosari va boshqa tegishli mas’ullar tomonidan mazkur manzil yaqinida yashaydigan aholi uchun quriladigan alleyaning taqdimot marosimi o‘tkazilgan.
Ta’kidlanishicha, Gagarin haykali va uning atrofidagi hududlar Vazirlar Mahkamasining 2019-yil 4-oktabrdagi 846-sonli “Moddiy madaniy merosning ko‘chmas mulk obyektlari milliy ro‘yxatini tasdiqlash to‘g‘risida”gi qarori bilan Moddiy madaniy merosning ko‘chmas mulk obyekti sifatida e’tirof etilgani bois, Madaniy meros agentligi qoshidagi Ilmiy-ekspert kengashining ruxsati olingandan so‘ng, haykal atrofida ham ta’mirlash ishlari boshlanadi.
“Ta’mirlash jarayonida bu yerdan qatnovchi aholiga noqulayliklar bo‘lishi mumkin va buning uchun uzr so‘raymiz”, — deyiladi xabarda.
Avvalroq ijtimoiy tarmoqlarda Toshkent shahridagi “Koinot” (Kosmonavtlar) majmuasida Vladimir Janibekov haykali atrofidagi granit plitalar ko‘chirib tashlangani haqida xabar tarqalgandi. Shundan so‘ng Madaniy meros agentligi hududning demontaj ishlari ruxsatsiz boshlanganini aniqlagan. Agentlik tomonidan maydonni rekonstruksiya qilayotgan Mimar Group kompaniyasi ogohlantirilgani va jarayon to‘xtatilgani ma’lum qilingan. 15-fevral kuni esa Kosmonavtlar maydonini obodonlashtirish loyihasi ilmiy-ekspert kengashida ma’qullangan.
Izoh (0)