Andijon viloyatining Asaka tumanidagi fermer xo‘jaligida uch nafar fuqaro is gazidan zaharlanib vafot etdi. Bu haqda “Daryo” muxbiri xabar berdi.
Viloyat Favqulodda vaziyatlar boshqarmasining Ommaviy axborot vositalari va jamoat tashkilotlari bilan hamkorlik qilish guruhi boshlig‘i, mayor Sardor Zulunovning ma’lumot berishicha, 14-fevral kuni soat 10:30 da Asaka tumani Favqulodda vaziyatlar bo‘limiga tumandagi “Asaka zotli chorva” fermer xo‘jaligi binosida uch nafar fuqaro jasadi topilgani xabar berilgan.Shuningdek, 2022-yilning 12-fevral kuni soat 13:30 da Xo‘jaobod tumani Favqulodda vaziyatlar bo‘limiga hamda tuman Ichki ishlar bo‘limi navbatchilik qismiga tumandagi “Mustaqillikning 27 yilligi” mahallasi hududida joylashgan bog‘dagi dala hovlida ayol kishi is gazidan zaharlanib, vafot etgani xabar qilingan.
“Andijon tumanining ‘Islomobod’ mahallasida yashovchi fuqaro M.Q. turmush o‘rtog‘i I.Q. bilan Xo‘jaobod tumanidagi bog‘da joylashgan hovlisiga kelgan. Ular uyini isitish maqsadida uyga tog‘orada cho‘g‘ olib kirgan. Oqibatda ayol is gazidan zaharlanib vafot etgan, er esa zudlik bilan Respublika shoshilinch tez tibbiy yordam ilmiy markazi viloyat filialining jonlantirish bo‘limiga yotqizilgan”, — deydi Sardor Zulunov.
Qayd etilishicha, har ikki holat yuzasidan prokuratura organlari tomonidan sud tibbiy ekspertizasi tayinlanib, tergov oldi surishtiruv ishlari olib borilmoqda.
Izoh (0)