Jinoyat ishlari bo‘yicha Mirzo Ulug‘bek tuman sudida mast holatda tanishini pichoqlab o‘ldirgan shaxsga hukm o‘qildi. Bu haqda “Yoshlar” telekanali orqali efirga uzatilgan lavhada ma’lum qilindi.
Ma’lum qilinishicha, 25 yoshli sudlanuvchi sherigi bilan (1971-yilda tug‘ilgan) qurilish ishlari ketayotgan hududdagi ishlarini tugatib, 100 ming so‘m ish haqi olgan. Ishlab topilgan pullarga spirtli ichimlik sotib olib, birgalikda ichgan.
Shundan so‘ng ular jabrlanuvchining uyiga qaytishgan va orada yuzaga kelgan og‘zaki nizo pichoqlashuvgacha borgan.
“Ikkinchi marta janjal boshlanganida u birinchi bo‘lib pichoq olgan, keyin men ham o‘zimni himoya qilish uchun pichoq olganman... Ekpertlarning aytishicha, 39 marta pichoq uribman. Qilgan ishimdan pushaymonman”, — deya ta’kidlaydi sudlanuvchi.
Ta’kidlanishicha, u qilgan ishi jinoyat ekanini bilgan holda ichki ishlar xodimlariga qo‘ng‘iroq qilgan, marhum olgan jarohatlari tufayli voqea joyida vafot etgan.
Sudlanuvchiga Jinoyat kodeksining 97-moddasi (qasddan odam o‘ldirish) 2-qismi “j” bandi, 168 modda (firibagarlik) 1-qismi bilan aybli deb topilgan. Unga nisbatan Jinoyat kodeksining 59-moddasi (bir necha jinoyat sodir etganlik uchun jazo tayinlash) qo‘llanilib, 15 yil 1 oy muddatga ozodlikdan mahrum qilingan.
Avvalroq Toshkentda ayol rashk sabab erini pichoqlab qo‘ygani, Namanganda 35 yoshli mast erkak haqorat qilgani uchun sinfdoshini pichoqlagani, Andijonda uyiga kelib janjallashgan qaynopasini pichoqlab, o‘ldirgan yigitga sud hukmi o‘qilgani to‘g‘risida xabar berilgandi.
Izoh (0)