Qashqadaryoda YPX xodimlari bilan janjallashgan haydovchi 14 sutkaga qamaldi

Qashqadaryo viloyati Yakkabog‘ tumanida yo‘l-patrul xizmati xodimlari va fuqarolar o‘rtasida tortishuv yuzaga kelgani xabar qilingandi. Yo‘l harakati xavfsizligi xizmatining ma’lum qilishicha, qoidabuzar shaxslarga sud tomonidan jazo tayinlangan.

15-fevral kuni soat 09:30 larda Yakkabog‘ tumani Amir Temur ko‘chasida xizmat olib borayotgan YPX xodimi B.Karimov tomonidan Nexia-3 avtomobili haydovchisiga xavfsizlik kamaridan foydalanmagani uchun to‘xtash ishorasi ko‘rsatilgan. Haydovchi ishoraga bo‘ysunmasdan harakatda davom etgan. Ko‘rilgan choralar natijasida haydovchi to‘xtatilgan.

YPX xodimlari tomonidan qoidabuzarligi bo‘yicha tushuntirishlar berilishiga qaramasdan, haydovchi inspektorlarga faol qarshilik ko‘rsatib atrofdagilarning ham e’tiborini mazkur vaziyatga jalb etgan. Jarayon davomida atrofda bo‘lgan ayrim fuqarolar YPX xodimlarining o‘z xizmat faoliyatini bajarishiga xalaqit bergan.

Haydovchi va atrofdagi ba’zi fuqarolar xodimlarning xizmat vazifasini bajarishga xalaqit bergani holati bo‘yicha to‘plangan hujjatlar 16-fevral kuni jinoyat ishlari bo‘yicha Yakkabog‘ tuman sudi tomonidan o‘rganib chiqilgan.

Nexia-3 avtomobili haydovchisi N.X. (1990-yilda tug‘ilgan)ning xatti-harakatlarida Ma’muriy javobgarlik to‘g‘risidagi kodeksning 194-moddasi 1-qismi (ichki ishlar organlari xodimining qonuniy talablarini bajarmaslik) hamda 195-moddasida (ichki ishlar organlari xodimlarining o‘z xizmat burchlarini bajarishlariga qarshilik ko‘rsatish) ko‘rsatilgan huquqbuzarlik alomatlari mavjud deb topilgan. Unga nisbatan 14 sutka ma’muriy qamoq jazosi tayinlangan.

Shuningdek, F.U. (1985-yilda tug‘ilgan) hamda A.B. (1987-yilda tug‘ilgan)ning xatti-harakatlarida Ma’muriy javobgarlik to‘g‘risidagi kodeksning 194-moddasi 1-qismida ko‘rsatilgan huquqbuzarlik alomatlari mavjud deb topilgan. Ularning har biriga BHMning 3 baravari miqdorida (810 ming so‘m) jarima jazosi tayinlangan.