O‘zbekistondagi 4 ta oliy ta’lim muassasasi ilk bor Buyuk Britaniyaning Times Higher Education agentligini Young University Rankings – 2022 (“Yosh universitetlar reytingi – 2022”) reytingidan o‘rin oldi. Bu haqda Ta’lim sifatini nazorat qilish davlat inspeksiyasi xabar berdi.
Mazkur OTMlar yangi turdagi maqom — “Reporter” universitetlar qatorida e’tirof etilgan. Bular:
- Toshkent davlat yuridik universiteti;
- Toshkent pediatriya tibbiyot instituti;
- Turin politexnika universiteti;
- Urganch davlat universiteti.
Ma’lumot uchun, Young University Rankings reytingi dunyoning 50 va undan kichik yoshdagi eng yaxshi universitetlari ro‘yxatini tuzadi. Ro‘yxat World University Rankings flagmani bilan bir xil 13 ta mezon ko‘rsatkichlariga asoslangan. 2022-yilgi reyting 539 ta universitetni o‘z ichiga olib, shundan 251 ta oliygoh “Reporter” maqomiga ega bo‘lgan.
Eslatib o‘tamiz, 2020-yilda O‘zbekistonning to‘rtta universiteti Sharqiy Yevropa va Markaziy Osiyoning eng yaxshi oliygohlari qatoriga kirgan, 2021-yilning sentabrida esa O‘zbekistondagi 10 ta OTM dunyoning yetakchi universitetlari reytingiga kirish uchun nomzod sifatida tanlab olingan edi.
Izoh (0)