Тошкентнинг Чилонзор туманида жойлашган Гагарин ҳайкали ва унинг атрофидаги ҳудудлар таъмирланади. Бу ҳақда туман ҳокимлиги матбуот хизмати хабар берди.
Маълум қилинишича, тумандаги «1-Катта Чилонзор» ва «2-Катта Чилонзор» маҳаллалари ўртасида жойлашган сайилгоҳ анчадан бери қаровсиз аҳволда бўлгани учун уни таъмирлаш бўйича аҳолидан кўплаб мурожаатлар келиб тушган. Мазкур мурожаатлар ечими сифатида ҳозирда бу ерда қурилиш ва таъмирлаш ишлари бошлаб юборилган. Қайд этилишича, туманнинг «3-Катта Чилонзор» маҳалласи ҳудудида жойлашган, 1962 йилда қурилган Гагарин ҳайкали атрофини ҳам таъмирлаш режалаштирилган.
13 февраль куни Чилонзор тумани ҳокимининг Архитектура, қурилиш ва коммуникацияларни ривожлантириш бўйича ўринбосари ва бошқа тегишли масъуллар томонидан мазкур манзил яқинида яшайдиган аҳоли учун қуриладиган аллеянинг тақдимот маросими ўтказилган.
Таъкидланишича, Гагарин ҳайкали ва унинг атрофидаги ҳудудлар Вазирлар Маҳкамасининг 2019 йил 4 октябрдаги 846-сонли «Моддий маданий мероснинг кўчмас мулк объектлари миллий рўйхатини тасдиқлаш тўғрисида»ги қарори билан Моддий маданий мероснинг кўчмас мулк объекти сифатида эътироф этилгани боис, Маданий мерос агентлиги қошидаги Илмий-эксперт кенгашининг рухсати олингандан сўнг, ҳайкал атрофида ҳам таъмирлаш ишлари бошланади.
«Таъмирлаш жараёнида бу ердан қатновчи аҳолига ноқулайликлар бўлиши мумкин ва бунинг учун узр сўраймиз», — дейилади хабарда.
Аввалроқ ижтимоий тармоқларда Тошкент шаҳридаги «Коинот» (Космонавтлар) мажмуасида Владимир Жанибеков ҳайкали атрофидаги гранит плиталар кўчириб ташлангани ҳақида хабар тарқалганди. Шундан сўнг Маданий мерос агентлиги ҳудуднинг демонтаж ишлари рухсатсиз бошланганини аниқлаган. Агентлик томонидан майдонни реконструкция қилаётган Mimar Group компанияси огоҳлантирилгани ва жараён тўхтатилгани маълум қилинган. 15 февраль куни эса Космонавтлар майдонини ободонлаштириш лойиҳаси илмий-эксперт кенгашида маъқулланган.
Изоҳ (0)