Ўзбекистондаги 4 та олий таълим муассасаси илк бор Буюк Британиянинг Times Higher Education агентлигини Young University Rankings – 2022 («Ёш университетлар рейтинги – 2022») рейтингидан ўрин олди. Бу ҳақда Таълим сифатини назорат қилиш давлат инспекцияси хабар берди.
Мазкур ОТМлар янги турдаги мақом — «Reporter» университетлар қаторида эътироф этилган. Булар:
- Тошкент давлат юридик университети;
- Тошкент педиатрия тиббиёт институти;
- Турин политехника университети;
- Урганч давлат университети.
Маълумот учун, Young University Rankings рейтинги дунёнинг 50 ва ундан кичик ёшдаги энг яхши университетлари рўйхатини тузади. Рўйхат World University Rankings флагмани билан бир хил 13 та мезон кўрсаткичларига асосланган. 2022 йилги рейтинг 539 та университетни ўз ичига олиб, шундан 251 та олийгоҳ «Reporter» мақомига эга бўлган.
Эслатиб ўтамиз, 2020 йилда Ўзбекистоннинг тўртта университети Шарқий Европа ва Марказий Осиёнинг энг яхши олийгоҳлари қаторига кирган, 2021 йилнинг сентябрида эса Ўзбекистондаги 10 та ОТМ дунёнинг етакчи университетлари рейтингига кириш учун номзод сифатида танлаб олинган эди.
Изоҳ (0)